መስከረም 20/2007 ዓ.ም

በትናንትናው እለት በአዳማ ከተማ በራስ ሆቴል አዳራሽ የአ/አ እና የመቀሌ ዩንቨርስቲ ምሁራን እና  የኢትዮጲያ እንባ ጠባቂ ተቋም የተሳተፉበት ግምገማ ተካሂዷል፡፡ ግምገማውም ምቹ የሆነ ለአንደኛ እና ለሁለተኛ ደረጃ ትምህርት ቤት ማስተማሪያነት በተዘጋጀው ሰነድ ላይ ሲሆን ሰነዱ ላይም ማሻሻያ ሀሳቦች ከተሳታፊዎች ቀርበዋል ፡፡

የግምገማውን የመክፈቻ ንግግር ያደረጉት የትምህርት ሚኒስቴር ሚኒስተር ዴታ አቶ ፉአድ ኢብራሂም ናቸው፡፡ ይህ ግምገማ ዛሬም እንደሚቀጥል ለዛሚ 90.7 ኤፍ ኤም የገለጹት የሰብአዊ መብት ኮሚሽን የሕጻናትና የሴቶች ጉዳይ ኮሚሽን ኮሚሽነር ወይዘሮ አስማሩ በሪሁን ናቸው፡፡ (ታሪክ አዱኛ)

Tuesday, 30 September 2014 09:12

በአልጄሪያ ፈረንሳያዊው ቱሪስት መገደሉን ተከትሎ የቱሪዝም ዘርፉ ሊጎዳ እንደሚችል ተነገረ፡፡

መስከረም 20/2007 ዓ.ም

ባለፈው ሳምንት በሀገር ውስጥ ታጣቂዎች በፈረንሳዩ ቱሪስት ላይ የተደረገው አፈና እና ግድያ ከአይ ኤስ ጋር የተያያዘ ነው ተብሏል፡፡

ይህም የሰሜን አፍሪካ ሀገራትን ያሰጋ ሲሆን የቱሪዝም ኢንዱስትሪውም ተቀዛቅዟል፡፡

በአልጄሪያ ደቡብ ክፍል ያሉት በርካታ የቱሪዝም ኤጀንሲዎች ባቀረቡት ሪፖርት መሰረት በርካታ ጎብኚዎች ወደ ሰሀራ በረሀ ሊያደርጉት የነበረውን ጉዞ ሰርዘዋል፡፡ ኤጀንሲዎቹ ከፍተኛ የምጣኔ ሀብት ለውጥ ማምጣት የሚችለውን ቱሪዝምን ለማጠናከር ሀገሪቱ ምቹና ሰላማዊ መሆኗ በስፋት ሊቀሰቀስ ይገባል እያሉ ነው፡፡

የ55 ዓመቱ ፈረንሳያዊ ጎብኚ ጉዳይ ግን በእቅዱ ላይ ከፍተኛ የሆነ እንቅፋት ሆኗል፡፡

አልጄሪያ መሰል ተግባራትን ለመከላከል ተጨማሪ ወታደራዊ ሀይል ያሰማራች ሲሆን ቱሪስቶችም መረጃዎችን አሟልተው የሚገኙበትና እነርሱም በግልፅ ያሉበትን ሁኔታ የሚናሩበት መንገድ ምቹ ሆኗል፡፡ ዜናው የኦል አፍሪካ ነው፡፡

መስከረም 20/2007 ዓ.ም

ይህንን ያሉት የትግራይ ባህልና ቱሪዝም ዋና  ስራ አስኪያጅ አቶ ከበደ አማረ  ሲሆኑ በተለይም የክልሉ ባህላዊ እሴት ተጠብቆ ለትውልድ አንዲተላለፍና ለጎበኚ ምቹ አንዲሆን የተለያዩ አማራጮችን ተጠቅመን አየሰራን ነው ብለዋል፡፡
ከዚህም በተጨማሪ የመቀሌ ቤተመንግስት ለቱሪስት ምቹ እንድሆን ለማስቻል በቅርብ ጊዜ ውስጥ ስራ ለመጀመር እቅድ ይዘናል ማለታቸውን ባልደረባችን ያልፋል አሻግር ዘግቧል፡፡ (ያልፋል አሻግር)

መስከረም 19/2007 ዓ.ም

በድንገተኛ አደጋ (ችግር) ምክንያት ታካሚዎች ወደየሆስፒታል በመሄድ ህክምና ለማግኘት በሚደረገው እንቅስቃሴ ውስጥ የታካሚዎችን እንግልት ለመቀነስ የድንገተኛ ህክምና ግብረ-ሃይል የተቋቋመ ሲሆን ግብረ-ሃይሉም ታካሚዎች የሚገጥማቸውን እንግልት መቀነሱ ተገልጧል፡፡

የጤና ጥበቃ ሚኒስቴር ከአዲስ አበባ ጤና ቢሮ ጋር በመተባበር ግብረ-ሃይሉ የሚያደርገውን እንቅስቃሴ የሚከታተል ሲሆን በ24 ሰዓት ውስጥ በአዲስ አበባ የተከናወኑ ጉዳዮች ላይም ሪፖርት እንደሚያቀርብ የአዲስ አበባ ከተማ አስተዳደር ጤና ቢሮ ሃላፊ የሆኑት አቶ ግርማ አሸናፊ ተናግረዋል፡፡

የህክምና ተቋሞችም ለታካሚ ተገቢውን ህክምና ማድረግ ካልቻሉ ታካሚዎችን በራሳቸው አምቡላንስ ወደ ሌላ ተቋም ይወስዳሉ፡፡ በዚህም የወላጆችንና የታካሚዎችን እንግልት በመቀነስ ረገድ አስተዋፅኦ እያበረከተ ይገኛል፡፡

ወላጅ እናቶች በቤታቸው ሆነው አገልግሎት በሚፈልጉበት ወቅት የጤና ተቋማትን ማናገር እንዲሁም ታካሚዎች ያላቸውን ቅሬታ ወደ 0937-93-93-93 ወይም ወደ 0937-94-94-94 በመደወል ማቅረብ እና አገልግሎቱን ማግኘት እንደሚችሉም አቶ ግርማ አሸናፊ ጨምረው ተናግረዋል፡፡ (ርብቃ ታያቸው)

መስከረም 19/2007 ዓ.ም

በኢትዮጵያ ኦርቶዶክስ ቤተ-ክርስቲያን ፓትርያርክ ብፁዕ ወቅዱስ አቡነ ማቲያስ የተመራ የኢትዮጵያ ኦርቶዶክስ ተዋህዶ ቤተ-ክርስቲያን ጳጳሳትና ምዕመናን የተካተቱበት ቡድን ኮተቤ በሚገኘው መቄዶንያ የአረጋዊያንና የአእምሮ ህሙማን መርጃ ማዕከል ተገኝቶ ጎብኝቷል፡፡ በጉብኝቱ ወቅት ብፁዕ ወቅዱስ አቡነ ማቲያስ ባስተላለፉት መልዕክት የማዕከሉ ተሞክሮ ለሌሎች አርአያና ምሳሌ የሚሆን ነው ካሉ በኋላ እነዚህ ደጋፊ የሌላቸው ወገኖችን መርዳት የጥቂቶች ብቻ ሳይሆን መላ ኢትዮጵያውያን ሊሳተፉበት የሚገባ ተግባር ነው ብለዋል፡፡ ማዕከሉ ዘር፣ ሃይማኖትና ብሔር ሳይለይ ማንኛውም የተቸገረ ኢትዮጵያዊ የሚረዳበት እንደመሆኑ ህብረተሰቡ ከማዕከሉ ጎን ይቆም ዘንድ ጥሪያቸውን አስተላልፈዋል፡፡

የኢትዮጵያ ኦርቶዶክስ ተዋህዶ ቤተ-ክርስቲያንም ለማዕከሉ የ100ሺ ብር ድጋፍ ያደረገች ሲሆን ወደፊትም ድጋፏን አጠናክራ እንደምትቀጥል ፓትርያርኩ ቃለ ገብተዋል፡፡ (እንደገና ደሳለኝ)

Monday, 29 September 2014 09:51

ደቡብ አፍሪካ ለኩባ 31 ሚሊዮን የአሜሪካን ዶላር በእርዳታ ለመስጠት ተስማምታለች፡፡

መስከረም 19/2007 ዓ.ም

ይህንን እርዳታ ለመስጠት ከስምምነት የደረሱት በሶስት ጊዜ ክፍያ ሲሆን የመጀመሪያው ክፍያ ለኩባ የግብርናው ዘርፍ የዘር እርዳታ የሚውል 3.57 ሚሊዮን ዶላር ነው፡፡

ሁለተኛው 8.93 ሚሊዮን ዶላር የተለያዩ ግብአቶችን ከደቡብ አፍሪካ ለመግዛት የመጨረሻው ደግሞ 18.75 ሚሊዮን ዶላር የሚሆን እርዳታ እንደሆነ ተገልጧል፡፡

ጉዳዩን በተመለከተ አስተያየታቸውን የሰጡ ህግ አውጪዎች ስምምነቱን እየተቃወሙት ነው፡፡

የህዝብን ገንዘብ ያለአግባብ የመጠቀም አካሄድ ነው የሚል አስተያየትም ተሰጥቶበታል፡፡

የደቡብ አፍሪካ ፕሬዝዳንት ጃኮብ ዙማ የዚህን እርዳታ በተመለከተ እ.ኤ.አ በ2010 ቃል ገብተው እንደነበርም ዘገባው አስታውሷል፡፡ ዘገባው የዴይሊ ኒውስ ነው፡፡