አገር አቀፍ ዜናዎች

ጥቅምት 19/2007 ዓ.ም

ሃንድ ሜድ ካንድል ወይም በእጅ የሚሰሩት ሻማዎችን በጌጠኛ መልኩ በመስራት ለገበያ ማቅረብ በአውሮፓውያኑ ዘንድ መለመዱን የተለያዩ መረጃዎች ያመላክታሉ፡፡

አውሮፓውኑ እነዚህ ጌጠኛ ሻማዎች ለብርሃናቸው ብቻ ሳይሆን ለጠረናቸው እንዲሁም ለቤት ማሳመሪያነት ጭምር ይጠቀሙባቸዋል፡፡

ታዲያ ይህን ሻማ በእጅ ሰርቶና አሳምሮ ለገበያ የማቅረቡን ስራ በሀገራችን እንዴት ነው ብዬ የተለያዩ የገበያ ቦታዎችን ስቃኝ የተመለከትኩት እጅግ አበረታች ሆኖ አግኝቼዋለው፡፡

ወ/ሪት መክሊት ሰለሞን መገናኛ አካባቢ በሚገኝ አንድ ሻማ ሱቅ ውስጥ ትሰራለች፡፡ በዘሁኑ ወቅት አንድ በእጅ የሚሰራ ሻማ ከ160 ብር እስከ 900 ብር የሚሸጥ ሲሆን ፈላጊው ብዙ ነው ብላለች፡፡ ገዢዎችም የሀገር ውስጥና የውጪ ዜጎች እንደሆኑ ገልፃለች፡፡ (ትዝታ ክንዴ)

ጥቅምት 19/2007 ዓ.ም

ተከሳሽ ዘውድነሽ ተሰማና ሌሎች አምስት ግለሰቦች በኢምግሬሽንና የዜግነት ጉዳይ ዋና መምሪያ መስሪያ ቤት በተለያዩ የፋይናንስና የአስተዳደር ክፍሎች ላይ በሃላፊነትና በሰራተኝነት ሲሰሩ በነበረበት ወቅት የተሰጣቸውን ስልጣን ያለ አግባብ በመገልግል እንዲሁም ከተሰጣቸው ስልጣን አሳልፈው በመስራት የማይገባ ጥቅም ለማግኘት በፈፀሙት ወንጀል ነው በፌዴራል ስነ-ምግበርና ፀረ-ሙስና ኮሚሽን አቃቤ ህግ ክስ ሊመሰረትባቸው የቻለው፡፡

የክሱ ጭብጥ እንደሚያስረዳው ከሆነ ተከሳሾቹ መስሪያ ቤቱ እ.ኤ.አ ከኦገስት 10/2005 እስከ ዲሴምበር 3/2005 ዓ.ም ድረስ ከኢትዮጵያ አየር መንገድ ከተሰበሰበው ገንዘብ ውስጥ ሁለት ሺ አንድ መቶ ዶላር ወይም በወቅቱ ምንዛሬ አንድ ሚሊዮን ሰባት መቶ ሰላሳ ስምንት ሺ አምስት መቶ አስር ብ እንዳያገኝ አድርገዋል፡፡

ክሱን የተመለከተው የፌዴራል ከፍተኛ ፍ/ቤት ልደታ ምድብ 18ኛ ወንጀል ችሎት 2ኛ እና 3ኛ ተከሳሾች ነፃ እንዲሆኑ ሲወስን ቀሪዎቹ እያንዳንዳቸው በ8 ዓመት ከ6 ወር ፅኑ እስራት እንዲቀጡ ወስኖባቸዋል፡፡ (ቴድሮስ ብርሀኑ)

ጥቅምት 18/2007 ዓ.ም

የባህልና ቱሪዝም ሚኒስቴር በሆቴሎች ዙሪያ አጠቃላይ መስፈርቶችን በማዘጋጀት የሆቴሎችን ደረጃ ለመሰየም በዚህ ዓመት ደረጃዎች እንደሚሰጥ የሚንስቴር መ/ቤቱ የህዝብ እና ዓለም አቀፍ ግንኙነት ዳይሬክቶሬት ዳይሬክተር አቶ ገዛኸኝ አባተ ለዛሚ 90.7 ኤፍ ኤም ተናግረዋል፡፡

እስከ አሁን ድረስ በሆቴሎቹ በኩል እየተነገሩ ያሉ ደረጃዎች በተቀመጠለቻው መስፈርት ተመዝነው የተሰጡ አለመሆኑም ታውቋል፡፡

የሆቴል ባለቤቶች ባለ አራት እና አምስት ኮከብ ሆቴል ነው በሚል በራሳቸው ከሚሰጡት ስያሜ እንዲቆጠቡም ዳይሬክተሩ አሳስበዋል፡፡ (ሱራፌል ዘላለም)

ጥቅምት 18/2007 ዓ.ም

ተከሳሽ ምዑዝ ፀጋዬ ገ/ሚካኤል በልደታ ክ/ከተማ ወረዳ 1 ፋይናንስ ፅ/ቤት ረዳት ፋይናንስ ኦፊሰር በነበረበት ወቅት ከጥር 3/2005 ዓ.ም እስከ ሰኔ 7/2005 ዓ.ም ድረስ ተገቢ ያልሆነ ብልፅግና ለማግኘት ወይም በሌላ ሰው ለመጠቀም በስራው አጋጣሚ በእጁ ከገባው የመንግሥት ገንዘብ ውስጥ 283,747.08 የሚሆነውን በማጉደል በፈፀመው የእምነት ማጉደል ተግባር ነው በፌዴራል ስነ-ምግባርና ፀረ-ሙስና ኮሚሽን አቃቤ ህግ ክስ ሊመሰርትበት የቻለው፡፡

ተከሳሹ በበኩሉ ድርጊቱን አልፈፀምኩም በማለት መቃወሚያ አቅርቦ ሲከራከር የቆየ ቢሆንም ክሱን የተመለከተው የፌዴራል ከፍተኛ ፍ/ቤት ልደታ ምድብ 15ኛ ወንጀል ችሎት ውድቅ አድርጎበታል፡፡

ይህንን ተከትሎ ተከሳሹ በ1996 ዓ.ም የወጣውን የኤ.ፌ.ዴ.ሪ የወንጀል ህግ አንቀፅ 676 (1) ላይ የተመለከተውን በመተላለፉ ፍርድ ቤቱ በሙሉ ድምፅ ጥፋተኛ ሲል ወስኗል፡፡ (ቴድሮስ ብርሀኑ)

ጥቅምት 18/2007 ዓ.ም

መስከረም 23 ቀን 2006 ዓ.ም ወደ ዩኒቨርሲቲ ኮሌጅነት ያደገው ኮተቤ መምህራን ኮሌጅ ለከተማዋ ብሎም ለሀገሪቱ እድገት አጋዥ ሊሆኑ የሚችሉ የሳይንስና ቴክኖሎጂን የሚያስፋፉ አዳዲስ የትምህርት መስኮችን ከፍቷል፡፡

የዩኒቨርሲቲ ኮሌጁ ፕሬዝዳንት ዶ/ር አልማዝ ባራኪ እንደገለፁት ተመራቂዎች ከትምህርት በኋላ የራሳቸውን ስራ እንዲፈጥሩ የሚያስችላቸውን የኢንተርፕሩነር ሺፕ ስልጠናን ጨምሮ የከተማ፣ የትራንስፖርት አገልግሎት እና የአካባቢ ጥበቃ ላይ የሚያተኩር የትምህርት መስኮች ለመክፈት ተዘጋጅተዋል፡፡ (ትዝታ ክንዴ)

ጥቅምት 17/2007 ዓ.ም

የቀድሞ የፍትህ ጋዜጣ ዋና አዘጋጅ የነበረው ጋዜጠኛ ተመስገን ደሳለኝ ቅጣቱ የተላለፈበት በማስተዋል የህትመትና የማስታወቂያ ድርጅት ስር በፍትህ ጋዜጣ ታትሞ ሲሰራጭ በነበረው ወጣቱን ለአመፅ በሚያነሳሱ ፅሁፎች አቃቤ ህግ ክስ በመመስረቱ ነው፡፡ በዚህም የሰነድ፣ የማስረጃ እና የሰው ምስክር ቀርቧል፡፡ በዛሬው እለትም የፌዴራል ከፍተኛ ፍ/ቤት በ9ኛ ወንጀል ችሎት በ3 ዓመት ፅኑ እስራት እንዲቀጣ ሲወስንበት አቃቤ ህግ ያቀረበው የድርጅቱ እንዲወረስ ጥያቄን ውድቅ በማድረግ ድርጀቱን የ10,000 የገንዘብ ቅጣት አስተላልፎበታል፡፡ (ታሪክ አዱኛ)

ጥቅምት 17/2007 ዓ.ም

በ2006 ዓ.ም ለፌዴራል የመጀመሪያና የከፍተኛ ፍ/ቤት አዳዲስ ዳኞች መሾማቸው ይታወሳል፡፡ ነገር ግን ጠቅላይ ፍ/ቤት ተጨማሪ ዳኞችን ሳይሾም ቀርቷል፤ ምንክያቱ ደግሞ የማጣራት ስራውን ባለማጠናቀቃቸው መሆኑን ለዛሚ 90.7 ኤፍ ኤም የገለፁት የፌዴራል ጠቅላይ ፍ/ቤት ፕሬዝዳንት አቶ ተገኔ ጌታነህ ናቸው፡፡ በያዝነው 2007ዓ.ም ግን ተጨማሪ ዳኞችን እንደሚያሾም ተናግረዋል፡፡ በ2006 ዓ.ም በፍ/ቤት ካጋጠሙ ችግሮች የዳኖች እጥረት ተጠቃሽ እንደነበር ገልፀዋል፡፡ በተጨማሪም የርቀት ሙግትን በተመለከተ ለባለጉዳዮቹ ባሉበት ሆነው ጉዳያቸውን በቪዲዮ ኮንፈረንስ እንዲከታተሉ በተከፈቱ ማዕከላት ተገልጋዮች በቴክኒክ መቆራረጥ ምክንያት ሳይስተናገዱ የሚመለሱበት ችግር መኖሩንም ተናግረው ችግሩን ለመቅረፍ እየተሰራ መሆኑንም ገልፀዋል፡፡ ከ1 ወር በኋላም የዳኞች አስተዳደር ጉባዔ ያሻሻላቸውን ደንቦቹን ተግባራዊ እንደሚያደርም ገልፀዋል፡፡ (ታሪክ አዱኛ)

ጥቅምት 14/2007 ዓ.ም

በአማራ ብሄራዊ ክልላዊ መንግሥት በፌዴራል ከፍተኛ ፍ/ቤት መሰረታዊ ችግር የዳኛ እጥረት ሲሆን በክልሉ ፍ/ቤቶች በ2006 ዓ.ም ካጋጠሙ ችግሮች መካከል ደግሞ ከገጠር መሬት ጋር በተያያዘ በተፈለገው መልክ የማስረጃ ጥራት ችግር እና በገጠራማ ወረዳ ፍ/ቤቶች ለመስራት ፍቃደኛ አለመሆን ተጠቃሽ መሆኑን ለዛሚ 90.7 ኤፍ ኤም የገለፁት የክልሉ ጠቅላይ ፍ/ቤት ፕሬዝዳንት አቶ የኔነህ ስመኝ ናቸው፡፡ ይህንን ችግር ለመቅረፍ ፍ/ቤቱ ተጠናክሮ እየሰራ መሆኑን ገልፀዋል፡፡ በያዝነው በ2007 ዓ.ም በ5 ወረዳዎች ፍ/ቤት ለመክፈት መዘጋጀታቸውን ገልፀዋል፡፡ በኮንቦልቻ ሀብሩ ወረዳ 1 ፍ/ቤት ለመክፈት ደጋፊ ሰራተኛ ቅጥር ማጠናቀቃቸውን ተናግረዋል፡፡ በ2006 ዓ.ም በ6 ወረዳዎች የተከፈቱ ፍ/ቤቶች በዚህ ሰሞን ስራ እንደሚጀምሩ ገልፀዋል፡፡ (ታሪክ አዱኛ)

ጥቅምት 14/2007 ዓ.ም

ጥናቱን ያካሄደው የዓለም የስደተኞች ድርጅት በኢትዮጵያ እንዳመለከተው ከሆነ ከተጓዦቹ 80 በመቶ የሚሆኑት በህገ-ወጥ መንገድ መጓዝ የሚያስከትለውን ችግር ጠንቅቀው የሚያውቁ ናቸው፡፡ በህገ-ወጥ መንገድ የሚጓዙ ስደተኞች ከሚያጋጥሟቸው ችግሮች መካከል ውኃ ጥም፣ ከአቅም በላይ መስራት፣ መደብደብ፣ መደፈርና ሌሎችም እንደሆነ የጠቆመው ጥናቱ በአሁኑ ሰዓትም ችግሩ አይጨመር እንጂ እየቀነሰ ያለበት ሁኔታ እንደማይታይ አመላክቷል፡፡ ከዚህም በተጨማሪ የአህጉሪቱን ሰሜናዊ በር በመጠቀም ከ100ሺ በላይ ዜጎች ሜዲትራኒያን ባህርን ማቋረጣቸውን ለፌዴራልና ክልሎች የማህበራዊ ጉዳይ አካላት ተወካዮች የቀረበው ይኸው ጥናት ያስታወቀ ሲሆን ከነዚህም ውስጥ 3ሺ የሚሆኑት  በጉዞ ላይ ሂወታቸው ማለፉን ገልጧል፡፡ ይህንንም ለመከላከል በህዝቡ ውስጥ ያለውን የያገባኛል ስሜት ማዳበር ትኩረት ሊሰጠው የሚገባ ስራ እንደሆነ በመፍትሄ ሃሳብነት ጠቁሟል፡፡ (ቴድሮስ ብርሀኑ)

ጥቅምት 13/2007 ዓ.ም

በኢትዮጵያ የኢቦላ ቫይረስ ስርጭት ከመታየቱ በፊት እየተደረገ ባለው የቁጥጥረ ስራ በአየር መንገድ ከሚደረገው ምርመራ በተጨማሪ ስጋቱ ካለባቸው ሀገራት በሚመጡት ላይ ለ21 ቀናት ያህል ክትትል እንደሚደረግ ተገልጧል፡፡

የኢፌዴሪ ጤና ጥበቃ ሚኒስቴርና በኢትዮጵያ የህብረተሰብ ጤና ኢንስቲትዩት በሰጡት ገለፃ እንደተነገረው ተጠቂዎች ለብቻቸው ህክምና የሚያገኙበት 50 አልጋ የሚይዝ ሆስፒታልና 20 አልጋ የሚይዝ ጤና ጣቢያ በየካ ተገንብቷል፡፡

የሆስፒታሉ ግንባታ 90 በመቶ ያህል መጠናቀቁ ታውቋል፡፡ በዓሁኑ ሰዓት ከባለ 3 ኮከብ ሆቴልና ከዛ በላይ ላሉት ሆቴሎች ግንዛቤ ማስጨበጫ ስልጠና ተሰጥቷል፤ በተጨማሪ አዲስ አበባ ውስጥ ያሉትን ሌሎች ሆቴሎች ግንዛቤ እንዲያገኙ እንደሚደረግና ስልጠናው እስከ ወረዳ እንደሚዘልቅ ተገልጧል፡፡ (ማህሌት ካሳሁን)

ጥቅምት 13/2007 ዓ.ም

በአሁኑ ሰዓት በሴተኛ አዳሪዎች፣ በረዥም ጉዞ አሽከርካሪዎችና በልማት ቦታዎች ላይ ብቻ የኤች አይ ቪ ኤድስን የመከላከል ስራ እየተሰራ መሆኑ ተገልጧል፡፡ የዚህ ምክንያት ደግሞ በፊት ይመጣ የነበረው የዓለም አቀፍ ፈንድ በመቀነሱ እንደሆነ ለዛሚ 90.7 ኤፍ ኤም የገለፁት የኤች አይቪ ኤድስ መቆጣጠርና መከላከል ፅ/ቤት የባህሪ በሜዲካልና የመዋቅራዊ መከላከል አማካሪ አቶ እንዳሻው ወ/ሰንበት ናቸው፡፡ እንደ እ.ኤ.አ በ2011 የስነ-ህዝብና የጤና ዳሰሳ በተጠናው መሰረት 1.5 በመቶ በቫይረሱ የመያዝ ሁኔታ መቀነሱን ገልፀዋል፡፡ በሀገር አቀፍ የጤና ምርምር ጥናት የሴተኛ አዳሪዎች ዕውቀት የተሻለ ሀኖ መገኙቱንም ተናግረዋል፡፡ በጥናቱም በቫይረሱ የመያዝ እድላቸው መቀነሱን ተናግረዋል የህብረተሰቡ ግንዛቤ ሰፋ በማለቱ የመጣ ለውጥ ነው በማለት ተናግረዋል፡፡ (ታሪክ አዱኛ)

ጥቅምት 11/2006 ዓ.ም

ሀገራችን ኢትዮጵያ በስፋት እየሰራችበት ያለችው የግብርና ዘርፍ አጠቃላይ የኢኮኖሚ መስክ በበላይነት እየመራው የሚገኝ ቢሆንም ዘርፉ የሚጠይቀውን ቴክኖሎጂ በስፋት እየተጠቀመች አለመሆኑን መረጃዎች ያመላክታሉ፡፡ ወጪ ቆጣቢ እና አነስተኛ ወጪን የሚያስወጡ የምርት ውጤታቸውም ከፍተኛ መጠን ያላቸውን ቴክኖሎጂዎች ወደ ሀገር ውስጥ በማስገባት ላይ መሆኑን የግብርና ሚኒስቴር አስታውቋል፡፡ በመስመር መዝራት አካባቢውን የተላመዱ የምጥን ማዳበሪያ አቅርቦት ተጠቃሽ መሆናቸውን የገለፁት የሚኒስቴር መስሪያ ቤቱ የህዝብ ግንኙነት ሃላፊ አቶ አስራት ገ/ፃዲቅ ናቸው፡፡ (ነጋሽ በዳዳ)

ጥቅምት 10/2007 ዓ.ም

ወተትን ለማቀነባበር የሚያገለግሉት እነዚህ ግዙፍ የወተት መሳሪያዎች ወደ ኢትዮጵያ ሲገቡ የመጀመሪያ መሆናቸውን የድርጀቱ ዋና ስራ አስኪያጅ አቶ ምትኩ ነጋሳ ገልፀዋል፡፡ መሳሪያዎቹ ቅቤ፣እርጎ፣ወተት፣አይብ እና ክሬምን ለማቀነባበር የሚያግዙ ናቸው፡፡ ኤሌምቱ ኢንቲግሬትድ ወተት ኢንዱስትሪ 30ሺ ሊትር የማቀነባበር አቅም ሲኖረው በ24 ሰዓታት ከ60ሺ ሊትር በላይ ማቀነባበር ይችላል፡፡ ፋብሪካው በዋናነት ፓስቸራይዝድ ወተት፣ ረዥም እድሜ ያለው ወተት፣ ቅቤ፣ ቺዝ እና ሁለት የተለያዩ እርጎዎችን በማምረት ለተጠተቃሚዎች ያቀርባል፡፡ (ሰላም ተሾመ)

ጥቅምት 07/2007 ዓ.ም

ሚኒስትሩ ይህንን የተናገሩት በትናንትናው ዕለት በግብፅ ርዕሰ ከተማ ካይሮ ከኢትዮጰያ፣ ሱዳንና ግብፅ የተውጣጡ ከፍተኛ ሀላፊዎች በታላቁ የህዳሴ ግድብ ዙሪያ በመከሩበት ወቅት ነው፡፡

የኢትጵያ የውሀና መስኖ ኢነርጂ ሚኒስትሩ ባደረጉት የመክፈቻ ንግግር ኢትዮጵያ በሁሉም የአባይ ተፋሰስ ሀገራት መካከል ፍትሀዊ የውሀ ሀብት ክፍፍል እንዲኖር ፍላጎት እንዳላት ገልፀዋል፡፡ ይህንን ለማሳካትም ከተፋሰሱ ሀገራት ጋር በጋራ ለመስራት ቁርጠኛ አቋም እንዳላት አመልክተዋል፡፡

በጉባኤው ሶስቱ ሀገራት በታላቁ ህዳሴ ግድብ ዙሪያ በደረሱት ስምምነት መሰረት አጥኚና አማካሪዎችን ይፋ ያደርጋሉ ተብሎ ይጠበቃል፡፡

ሚኒስትሩ ጥናቱን ለማካሄድ ሀላፊነት የሚሰጣቸው አካላት ከአድሎ የፀዳ ትክክለኛ መረጃ ይፋ እንዲያደርጉም አሳስበዋል፡፡

በተመሳሳይ የግብፁ ፕሬዝዳንት አብዱል ፈታ አልሲሲ በትናንትናው ዕለት ከኢትዮጵያ የውሀ መስኖና ኢነርጂ ሚኒስትሮች ጋር ገንቢ ውይይት ማድረጋቸውን አህራም ኦንላየን የተባለው የሀገሪቱ የዜና አውታር በድረ-ገፁ ባወጣው ዘገባ አስነብቧል፡፡ 

ጥቅምት 07/2007 ዓ.ም

በከተማ ልማት ቤቶች ኮንስትራክሽን ሚኒስቴር ባለፉት 5 ዓመታት በትራንስፖርት ዘርፉ ከመደኛ የአስፓልት ግንባታ ወደ የፍጥነት መንገድ ግንባታ አቀም መሸጋገሩን አስታውቋል፡፡

አዳዲስ የአየር ማረፊያ ግንባታዎችም መካሄድ መቻላቸው ለሀገሪቱ የንግድ የቱሪዝምና ኢንቨስትመንት እንቅስቃሴ የበኩሉን አስተዋፅኦ ማድረግ መቻሉም ተገልጧል፡፡

ለግለሰብ መኖሪያ ቤቶ ለፋብሪካና በሌሎች ተቋማት የሚውል የህይል አቅርቦትን የሃይደሮ ፓወር የንፋስ ሃይል ማመንጫ ጣቢያዎችን መገንባት መቻልም በሀገሪቱ ውስጥ እየታየ ያለው የግንባታ ስራ አቅም ማደጉን ያሳያል ያሉት የከተማ ልማት ቤቶ ኮንስትራክሽን ሚ/ር ሚንስትር ዴኤታ አቶ ኃ/መስቀል ተፈራ ናቸው፡፡

የመንገድ ግንባታዎችን ተከትሎ የሚገነቡት የፍሳሽ ማስወገጃ ድሬንኤጆች ሚ/ር መስሪያ ቤቱ ካስቀመጠው እቅድ አኳያ በስፋት ተሰርተዋል ያሉት ሚኒስትር ዴኤታው በ5 ዓመት ውስጥ 210ሺ የጋራ መኖሪያ ቤቶ ይገነባሉ ተብሎ የታሰበ ቢሆን ከዚያ በላይ መድረስ ተችሏል ሲሉ ተናግረዋል፡፡

ይሁን እንጂ እነዚህ ስራዎች ከተያዘው እቅድ አንፃር ተሳክተቷል ሊባል የሚችል ቢሆንም በጥራትና በፍጥነት ከመገንባት አንፃር ክፍተቶ እንዳሉም አሳውቀዋል፡፡

አንዳንድ ከክልል ወደ አዲስ አበባ ያለምንም መረጃ ለስራ የሚገቡ ዜጎች ለአላስፈላጊ ጉዳት እየተዳረጉ እንደሆነ ተገለፀ፡፡

በርካታ ዜጎች በተለይም በገጠሩ የኢትዮጵያ ክፍል የሚገኙት በህገ-መንግሥቱ የተፈቀደላቸውን በየትኛውም ቦታ ተዘዋውሮ የመስራት መብት በመጠቀም ወደ አዲስ አበባ በመፍለስ ዘርፈ ብዙ ስራዎች ተሰማርተው ይገኛሉ፡፡

ይህም ቢሆን ቁጥራቸው አናሳ የማይባሉት ስለሚሄዱበት ቦታ ምንም መረጃ ሳይዙ በመዘዋወራቸው ምክንያት ላላስፈላጊ እንግልትና እንክርት ሲዳረጉ ይታያል፡፡ ከዚህም ባለፈ ሴቶች ለተለያዩ ወንጀሎች ሰለባ እየሆኑ እንደሆነ የአዲስ አበባ ፖሊስ ኮሚሽን ም/ኮሚሽነር የሆኑት ግርማ ካሳ ይገልፃሉ፡፡ ለህገ-ወጥ የጉልበት ብዝበዛ የሚዳረጉትም ጥቂት አለመሆናቸውን በመግለፅ ጭምር ችግሩን ለመቅረፍ ማንኛውም ከገጠራማ የሀገሪቱ ክፍል ወደ ከተማዋ የሚገባ ሰው በመናኸሪያዎች አካባቢ ባቋቋሟቸው ማዕከላት እንዲቀርብ በማድረግ የመጣበትን ምክንያትና አላማ በመጠየቅ በተሳሳተ መረጃ የገባ ከሆነ ከመጣበት ክልል ጋ በመነጋገር ወደ መጣበት አካባቢ እንዲመለስ የማድረግ ስራ እያሰሩ እንደሆነ ም/ኮሚሽነር ግርማ ገልፀዋል፡፡

ሆኖም ግን በአንዳንድ ክልሎች ላይ የሚታየው ተቀናጅቶ መስራት ክፍት ስራቸውን በተቀላጠፈ መልኩ እንዳይሰሩ ተግዳሮት እንደሆኑባቸው ነው ም/ኮሚሽነሩ የሚናገሩት፡፡

በአጠቃላይ ዜጎች ተዟዙሮ የመስራት መብታቸው እንደተጠበቀ ቢሆንም ካሉበት ቦታ ከመነሳታቸው በፊት ስለሚሄዱበት ቦታ በቂ መረጃ ይዘው መንቀሳቀስ እንዳለባቸው ም/ኮሚሽነር ግርማ ካሳ በተለይም ለዛሚ 90.7 ኤፍ ኤም ገልፀዋል፡፡ (ነጋሽ በዳዳ)

ጥቅምት 06/2007 ዓ.ም

ከአፍሪካ በህዝብ ብዛቷ 2ኛ ደረጃ ላይ እንደምትገኝ ያስታወሱት ጠቅላይ ሚኒስትር ኃ/ማርያም ደሳለኝ አፍሪካዊያን ወንድሞቻችንንና እህቶቻችንን ለማገዝ የራሳችንን ድርሻ መጫወት አለብን የሚል እቅድ ተይዟል ብለዋል፡፡ በመከላከያ ሰራዊት ውስጥ ያሉና የጤና ሙያተኞች የሆኑ ፍቃደኞች ለዓለም አቀፍ ትብብር ሊሰማሩ የሚገባ እንደሆነ ገልፀዋል፡፡ ጠቅላይ ሚኒስትሩ ተግባሩም በከፍተኛ ጥንቃቄ የሚከናወን እንደሆነ በዛሬው ዕለት በፓርላማ ንግግር ባደረጉበት ወቅት አስታውቀዋል፡፡ (ሱራፌል ዘላለም)

ጥቅምት 06/2007 ዓ.ም

ፕሬዝዳንት ዶ/ር ሙላቱ ተሾመ የኤሌክትሪክ መቆራረጥን በተመለከተ ይቅርታ መጠየቃቸውን ተከትሎ የህዝብ ተወካዮች ም/ቤት አባል አድናቆታቸውን ገልፀዋል፡፡

የህዝብ ተወካዮችና የፌዴሬሽን ም/ቤቶች መክፈቻ ስነ-ስርዓት ላይ የተገኙትና ንግግር ያደረጉት የኢ.ፌ.ዴ.ሪ ፕሬዝዳንት ዶ/ር ሙላቱ ተሾመ የኤሌክትሪክ መቆራረጥን ተከትሎ ህዝቡንና ባለሃብቱን ይቅርታ መጠየቃቸውን ይታወሳል፡፡

በዛሬው ዕለት የመንግሥትን አቋም ጠቅላይ ሚኒስትር ኃ/ማሪያም በገለፁበት ወቅት የም/ቤቱ አባል የተከበሩ አቶ ግርማ ሰይፉ ባልተለመደ ሁኔታ የተሟላም ባይሆን ለመብራት መቆራረጥ ለተፈጠረው ችግር ይቅርታ ለመጠየቅ ድፍረት በማሳየታቸው ምስጋናዩ የላቀ ነው ሲሉ ተደምጠዋል፡፡

ስለ ጉዳዩ ምላሽ የሰጡት ጠቅላይ ሚኒስትር ኃ/ማሪያም ደሳለኝ ይቅርታ መጠየቅ ዛሬ የተፈጠረ ድፍረት ሳይሆን የድርጅታችንና የመንግሥታችን ባህሪ መገለጫ ነው፤ ከጥንትም ጀምሮ ያለን ነው ብለዋል፡፡ (ሱራፌል ዘላለም)

ጥቅምት 06/2007 ዓ.ም

የጥቁር አንበሳ ሆስፒታል በቀን ከ1,500 በላይ ህሙማንን ያስተናግዳል፡፡

በዚህም የህክምና ተቋም እርዳታ ለማግኘት ከሚሄዱ ታካሚዎች ውስጥ ከፍተኛውን ቁጥር የሚይዙት ከክልል የሚመጡ ታካሚዎች ናቸው፡፡

እዚህ ታካሚዎች ከሚገጥማቸው ማህበራዊ ችግር የተነሳ በሚደረግላቸው ህምክናም ደስተኛ እንደማይሆኑ የጥቁር አንበሳ ሪፈራል ሆስፒታል ዋና ስራ አስፈፃሚ የት/ት ቤቱ ዲን የሆኑት ዶ/ር ማህሌት ይገረሙ ተናግረዋል፡፡

ከክልሎች የህክምና እርዳታን ለማግኘት የሚመጡ ታካሚዎችን እንግልት ለመቀነስ ከሌሎች ዩኒቨርሲቲ ሆስፒታሎች እንዲሁም ከጤና ጥበቃ ጋር በመነጋገር ላይ እንደሚገኙ ገልፀዋል፡፡ (ርብቃ ታያቸው)