አገር አቀፍ ዜናዎች

ሐምሌ 14/2007 ዓ.ም

ተከሳሽ አብዱሰላም አብዱልቃድር ቼኩ በሚወጣበት ቀን ወይም ቼኩ ለባንክ በሚቀርብበት ጊዜ የሚያዝበት በቂ ገንዘብ አለመኖሩን እያወቀ በሰኔ20/2006 ዓ.ም  ከቀኑ 8፡00 ሰዓት በልደታ ክፍለ ከተማ ወረዳ 07 ክልል ልዩ ቦታው ተክለሃይማኖት አሰብ ሆቴል ተብሎ ከሚጠራው አካባቢ የግል ተበዳይ ጋር በነበራቸው የንግድ ልውውጥ ከኦሮሚያ ኢንተርናሽናል ባንክ በሀምሌ 23 /06 ዓ/ም እንዲወስድ 570,000 (አምስት መቶ ሰባ ሺህ ብር) ቼክ በአካውንት ቁጥር  ፅፎ እና ፈርሞ ሰቶ የግል ተበዳይ ወኪል ገንዘቡን በሀምሌ 23/ 06 ዓ.ም ለማውጣት ወደ ባንክ ሲሄዱ ባንኩ ተከሳሽ በአካውንቱ ውስጥ በቂ ገንዘብ የለውም ተብሎ የተመለሰ በመሆኑ በ1996 ዓ.ም የወጣውን የኢ.ፌ.ድ.ሪ የወንጀል ህግ አንቀጽ 693/1/ ላይ የተመለከተውን በመተላለፍ፡፡ በፈፀመው የሚያዝበት ገንዘብ ሳይኖር ቼክ ማውጣት ወንጀል ተከሷል፡፡

በሌላ ክስ ደግሞ በ1ኛ ክስ በተጠቀሰ ጊዜና ቦታ ከተጠቀሰው የግል ተበዳይ ጋር በነበራቸው የንግድ ልውውጥ ለነሀሴ08/06 ዓ.ም ከንብ ኢንተርናሽናል ባንክ የሚመነዘር ብር በአካውንት ለ200,000 (ሁለት መቶ ሺህ ብር) ቼክ ፅፎ እና ፈርሞ ሰጥቶ የግል ተበዳይ ተወካይ አቶ ጣዕመ አድሃኖም ገንዘቡን ለማውጣት በ17/12/06 ዓ.ም ወደ ባንክ ሲሄዱ ባንኩ ተከሳሽ ከአካውንት ውስጥ በቂ ገንዘብ የለውም ተብሎ የተመለሰ በመሆኑ በፈፀመው የሚያዝበት ገንዘብ ሳይኖር ቼክ ማውጣት ወንጀል ተከሷል፡፡

ክሱን የተመለከተው የፌዴራል የከፍተኛ ፍ/ቤት ልደታ ምድብ 8ኛ ወንጀል ችሎት የዐቃቢ ህግ ማስረጃን መርምሮ ተከሳሽ ጥፋተኛ ነው በማለት 2 ዓመት ከ6ወር ፅኑ እስራት ወስኗል፡፡ (ታሪክ አዱኛ)

ሐምሌ 14/2007 ዓ.ም

የኢትዮጵያ ብሄራዊ ደም ባንክ ከህብረተሰቡ የሚሰበሰበውን ደም በአዲስ አበባ ለሚገኙ 120 ጤና ተቋማት በነፃ በማከፋፈል ህብረተሰቡ ተጠቃሚ እንዲሆን ያደርጋል፤ ይሁን እንጂ በአንዳንድ የጤና ተቋማት ላይ የሚታየው ደም የመሸጥ ስራ በአሰራሩ ላይ እንቅፋት እየፈጠረ ይገኛል ተባሏል፡፡

የኢትዮጵያ ብሄራዊ ደም ባንክ የሚደርሰውን ጥቆማ መሰረት በማድረግ በተከታታይ የድጋፍና የክትትል ስራዎች በማከናወን ሙሉ ለሙሉ ባይባልም በተወሰነ መልኩ ለመቅረፍ እየሰራ መሆኑን የኢትዮጵያ ብሔራዊ ደም ባንክ ምክትል ዳይሬክተር የሆኑት አቶ አብርሃም ዘለቀ ተናግረዋል፡፡

ለመንግሥትና ለግል የጤና ተቋማት በቀን ከ80-100 ከረጢት ደም የሚሰራጭ ሲሆን ከዚህ ውስጥ ጥቁር አምበሳ ደም በመውሰድ ከፍተኛ ቁጥር ይይዛል ተብሏል፡፡ በተለያዩ ምክንያቶችም 8 ከመቶ ያህል ደም አገልግሎት ላይ እንዳልዋለ አቶ አብርሃም ዘለቀ ለዛሚ 90.7 ኤፍ ኤም ተናግረዋል፡፡ (ርብቃ ታያቸው)

ሐምሌ 08/2007 ዓ.ም

ለመላው የእስልምና እምነት ተከታዮች እንኳን ለ1,436ኛው ሂጅሪያ ለኢድ-አልፈጥር በዓል ዋዜማ አደረሳችሁ ያሉት የፌዴራል ጠቅላይ ሸሪያ ፍ/ቤት ፕሬዝዳንት ሼህ መሀመድ አል ሙባረክ ሸህ ሙሀመድ አወል ናቸው፡፡

በዚህም መሰረት የኢድ-አልፈጥር በዓል የረመዳን ፆም ፍቺ ሐምሌ 9 ቀን 2007 ዓ.ም ሐሙስ ምሽት ጨረቃ ከታየች ሐምሌ 10 ቀን 2007 ዓ.ም እንደሚሆንና ጨረቃ ሐሙስ ምሽት ካልታየች ግን ቅዳሜ ሐምሌ 11 ቀን 2007 ዓ.ም እንደሚከበር ተገልጧል፡፡ (ነጋሽ በዳዳ)

ሐምሌ 08/2007 ዓ.ም

በዓለም ባንክ አማካኝነት በተካሄው የጎንዮሽ የውይይት መድረክ ላይ የፋይናንስ አጠቃቀም ለልማት መሳለጥ ቁልፍ ነው ተብሏል፡፡ በዚህም ተጠያቂነት ያለው ግልፅ የፈንድ አጠቃቀም ላይ ሰፊ ውይይት ነው የተካሄደው፡፡

የ2ኛውን የሚሊኒየም ግብ ለማሳካት ይረዳ ዘንድ የፖሊሲ ማሻሻያዎች ተግባራዊ ሊደረጉ ይገባል የተባለ ሲሆን በዘርፉ ያሉትን ውስንነቶች እንኳን 10 በመቶ ማሻሻል ቢቻል 250 ቢሊዮን ዶላር ለልማት ማዋል ይቻላል፡፡

በዚህ ውይይት ላይ የዓለም ባንክ ዓለም አቀፍ የአስተዳደር ዳይሬክተር ጀምስ ብሩምባይ ኢትዮጵያ በዘርፉ ያላትን ተሞክሮ በማስረዳት ደግሞ ከፋይናንስ እና ኢኮኖሚ ሚኒስቴር አቶ ሙሳ ሙሀመድ በዓለም ባንክ የፋይናንስ የዋና ዳይሬክተሩ ከፍተኛ አማካሪ አይሻን ፓቪሊስቲክን ጨምሮ ከአውሮፓ ህብረት እና IMF የተውጣጡ ባለሞያዎች ተገኝተዋል፡፡

በውይይቱ ማጠቃለያ የፋይናንስ አጠቃቀም መሻሻል ታዳጊ ሀገራት ያላቸውን እምቅ ሃብት አውጥተው መጠቀም እንዲችሉ የበለጠ ይረዳቸዋል ተብሏል፡፡ (ስምኦን ደረጄ)

ሐምሌ 06/2007 ዓ.ም

ጉባኤው እ.ኤ.አ በ2030 የከፋ ረሀብን ከዓለም ማስወገድ እንዲቻልም ምክክር እየተደረገበት ይገኛል፡፡ የጉባዔው ፕሬዝዳንት ክቡር ጠ/ሚኒስትር አቶ ኃ/ማርያም ደሳለኝ፣ የተባበሩት መንግሥታት ድርጅት ዋና ፀሃፊ ባንኪሙን፣ የዓለም ባንክ፣ የዓለም ንግድ ድርጅት፣ የዓለም የገንዘብ ተቋም (IMF) እንዲሁም የአፍሪካ ህብረት ሊቀ-መንበርና የተባበሩት መንግሥታት ድርጅት ኤጀንሲ ከፍተኛ መሪዎች በመክፈቻው ላይ ንግግር ያደረጉ ሲሆን የአዲስ አበባው ጉባዔ በመስከረም በኒውዮርክና በታህሳስ መጀመሪያ በፓሪስ ለሚደረጉ የዘላቂ ልማት ኮንፈረንሶች መሰረት የሚጣልበት እንደሚሆን ይጠበቃል፡፡ (ስምኦን ደረጄ)

ሐምሌ 06/2007 ዓ.ም

ዛሬ በተጀመረውና ትኩረቱን በአለም ዙሪያ ዘላቂ ልማትን ለማረጋገጥ ባደረገው በዚህ ጉባዔ ላይ ጉባዔው በተለያዩ በዝቅተኛ ዕድገት ውስጥ ላሉ ሀገራት ትኩረት እንዲሰጥ አበክረው የጠየቁት የኢ.ፌ.ዲ.ሪ ጠ/ሚ እና የሦስተኛው አለም አቀፍ የፋይናንስ ለልማት ጉባኤ ፕሬዚዳንት ሆነው የተመረጡት ክቡር አቶ ኃይለማሪያም ደሳለኝ ናቸው፡፡

በጉባዔው መጨረሻ የአዲስ አበባ የተግባር አጀንዳ የተባለው ሰነድ እንደሚፀድቅና ለሚቀጥሉት 15 ዓመታት እንደሚሰራበት ይጠበቃል፡፡ የተባበሩት መንግስታት ድርጅት ወና ፀሃፊ ባንኪሙን በበኩላቸው ባደረጉት የመክፈቻ ንግግር የኢትዮጵያን ህዝብ ለተለመደው እንግዳ ተቀባይነቱ ካመሰገኑ በኋላ ዝቅተኛ ገቢ ባላቸው ሀገራት ውስጥ በሚካሄዱ የጤና፣ የትምህርት፣ የመጠጥ ውሃ፣ የመሰረተ ልማት እና መሰል ሥራዎችን በቀጣይነት ለመደገፍ ጉባኤው ከፍተኛ አስተዋጽኦ ያበረክታል ብለዋል፡፡ (እንደገና ደሳለኝ)

ሰኔ 27/2007 ዓ.ም

482 በሁለተኛ ድግሪ እንዲሁም 7,779 ተማሪዎችን በመጀመሪ ዲግሪ አስመርቋል። 2,000 የሚሆኑ ተማሪዎች በምህንድስና የትምህርት መስክ ዲግሪያቸውን አጊንተዋል። አርቲስት ኪሮስ አለማየሁ፣ ቦብ ጊሊዶፍ እና የrainbow 4 childern school in mekelle መስራች ማክስ እና ካትሪን ሮቢንሰን የክብር ዶክትሬት ዲግሪ ተበርክቶላቸዋል። ከፍተኛ የመንግስት ባለስልጣናት፣ የተማሪዎች ወላጆች እና ጋዜጠኞችም በምርቃት ስነ-ስርዓቱ ላይ ተገኝተዋል፡፡ (ሰላም ተሾመ)

ሰኔ 26/2007 ዓ.ም

ምቹ የስራ አካባቢ ከመፈለግ፣ መሰረታዊ ቁሳቁሶች ያሉባቸው ተቋማትን ከመምረጥና ለመኖሪያ ቅርብ የሆነን የስራ ቦታ እንደ አማራጭ በማየት ጥቂት የማይባሉ የመንግሥት ሰራተኞች ስራቸውን በማቋረጥ ወደሌሎች መስሪያ ቤቶች እንደሚፈልሱ የገለፁት በሲቪል ሰርቪስ ሚኒስቴር የኮሚኒኬሽንና የውጭ ግንኙነት ዳይሬክቶሬት ዳይሬክተር የሆኑት አቶ መሀመድ ሰኢድ ናቸው፡፡

እንደ አቶ መሀመድ ገለፃ ከሆነ ከተጠቀሰውም በላይ ሰራተኞች ከአንዱ ወደ አንዱ መስሪያ ቤት እንዲፈልሱ የሚያደርጋቸው ዋናው ጉዳይ በፌዴራል ደረጃ የተለያየ የደመወዝ ስኬል መኖሩ ሲሆን መንግሥትም ይህንን ከግምት በማስገባት ቀደም ሲል 69 ይደርስ የነበረውን የስኬል አይነት ወደ 21 ለማድረስ ጥናት በማድረግ እየሰራ ይገኛል፡፡

በ2008 ዓ.ም በተስተካከለው ስኬል መሰረት መስራት ይጀመራል ተብሎ እንደሚጠበቅ የተናገሩት አቶ መሀመድ፤ ከዚህም በተጨማሪ ሰራተኛው ባለበት ተረጋግቶ እንዲሰራ የሰርቪስ፣ የሆቴል እና መሰል አገልግሎቶችን በተመጣጣኝ ዋጋ በአቅራቢያው እንዲያገኝ እየሰሩ እንደሆነ ለዛሚ 90.7 ኤፍ ኤም ገልፀዋል፡፡ (ቴድሮስ ብርሀኑ)

ሰኔ 25/2007 ዓ.ም

በመለ ዩኒቨርስቲ የመቐለ ቴክኖሎጂ ኢንስቲትዩት 5ኛ ዓመት የባይሎጂካልና ኬሚካል ኢንጅነሪንግ ተመራቂ ተማሪ የሆኑት አብፅሀ ገ/ስላሴ፣ ጉሀንሽ ሀድጉ እና ገብረዋህድ በላይ በጋራ በመሆን ፈጠራውን ሰርተውታል፡፡

የወባ ትንኝና ሌሎች ነፍሳት ወደ ቤት እንዳይገቡና እንዳይናደፉ የሚያደርገው ሻማ ለዚህ ተግባር የተሰራ መከላከያ ቅባትን ከሻማ ጋር በማዋሀድ የተሰራ ነው፡፡ ሻማው በተለይም በገጠራማ የሀገሪቱ ክፍል እንደ መብራት ብርሀን በመስጠት፣ ለወባ መከላከያነት እና እንደ ሰንደል መልካም መአዛን በመስጠት አገልግሎት ላይ የሚውል ነው፡፡

በመቐለ ቴክኖሎጂ ኢንስቲትዩት ተማሪዎች የተሰራው ይህ ሻማ የወባ በሽታን በመከላከል ረገድ ትልቅ አስተዋፅኦ ያበረክታል ተብሎለታል፡፡ (ሰላም ተሾመ)

ሰኔ 23/2007 ዓ.ም

ከሀገራችን ፈጣን የኢኮኖሚ እድገት ጋር ተያይዞ ይከሰታል ተብሎ የሚታሰበውን የአካባቢን ብክለት ለመቀነስ የሁሉም ዜጋ ሃላፊነት መሆኑ ተገልጧል፡፡

ባደጉት ሀገራት ሳይቀር ለአካባቢ ብክለት ዋነኛ መንስኤ ናቸው ከተባሉት ከፋብሪካዎች ባሻገር እያንዳንዱ ሰው በእለት ተእለት እንቅስቃሴው የሚያደርጋቸው እንቅስቃሴዎች ለችግሮቹ ተጨማሪ መንስኤ መሆናቸውን የተናገሩት የአዲስ አበባ ከተማ የአካባቢ ጥበቃ ባለስልጣን ምክትል ዋና ዳይሬክተር አቶ አዱኛ መኮንን ናቸው፡፡

ሃላፊው ይህን ያሉት በዛሬው እለት በዘርፉ አስተዋፅኦ ላበረከቱ ትምህርት ቤቶች እውቅና በተሰጠበት ወቅት ነው፡፡

ከቅርብ ዓመታት ወዲህ የክረምቱን ወራት ተከትለው በስፋት የሚስተዋሉት የችግኝ ተከላ ፕሮግራሞች ለአስተዋፅኦዋቸው እውቅና የሚሰጠው ቢሆንም አካሄዳቸው ግን ሳይንሱን የተከተለ ባለመሆኑ ውጤታቸው አጥጋቢ እንዳልነበረ ተገልጧል፡፡

በዚህም ከዘንድሮ ዓመት ጀምሮ ችግኞችን የሚተክሉ ተቋማት በቀጣይ የተተከሉት ችግኞችን በምን መልኩ መንከባከብ ይኖርባቸዋል የሚለውን መግባቢያ ከፈረሙ ብቻ መትከል እንደሚችሉ የገለፁት አቶ አዱኛ መኮንን ናቸው፡፡ እስከዛሬ ድረስ የተተከሉት ችግኞች ቢፀድቁ ኖሮ ሀገሪቱ በሙሉ በደን ትሸፈን እንደነበርም ገልፀዋል፡፡ (ነጋሽ በዳዳ)

ሰኔ 23/2007 ዓ.ም

ሀገሪቱ እየተከተለች ያለችው የአረንጓዴ ኢኮኖሚ መፍጠርና የአየር ንብረት ለውጥን መቆጣጠር ስራ ከሌሎች ሀገራት በተሻለ አስመስጋኝ ለውጥን እያሳየላት እንደሆነና በዚህም ሀገራት እየደገፏት እንደሆነ ነው የተሰማው፡፡

ዛሬ የአካባቢና ደን ሚኒስቴር ሀገሪቱን በመወከል ያደረገውን የሊማ ዲክላሬሽን ፊርማ በተመለከተና ቀጣይ ድጋፍ ለማድረግ የሚያስችል ምክክርን ከሚመለከታቸው አካላትና ከተለያዩ ሀገራት አምባሳደሮችና ተወካዮች ጋር የተነጋገረ ሲሆን መልካም የተባለ ግብረ መልስም ተገኝቷል፡፡

የአካባቢና ደን ሚኒስቴር ሚኒስትሩ አቶ በለጠ ተፈራ እንደተናገሩት ላለፏት ሶስትና አራት አመታት የሀገራችንን ሀሳብ በመደገፍና ስትራቴጂውን ከማስፈፀም አንፃር እንግሊዝና ኖርዌይ ቀዳሚ ሀገራት ነበሩ ያሉ ሲሆን ከዚህ በኋላም ሌሎች በርካታ ሀገራት ይህን ስራችንን እና እንቅስቃሴያችንን ለማገዝ እየመጡ ነውም ሲሉ ተናግረዋል፡፡

ሀገሪቱ በቀጣዩ አለም አቀፍ ስብሰባ እንደ ሀገርም እንደ አህጉርም ተወካይ ሆና የአየር ንብረት ለውጥ ላይ እንደቀደመው ጊዜ ተፅዕኖ ፈጣሪ ትሆናለች ሲሉም ሚኒስትሩ ገልፀዋል፡፡ (ያልፋል አሻግር)

ሰኔ 23/2007 ዓ.ም

የተለያዩ የጂኦሳይንስ ላብራቶሪ የስነ-ምድር መረጃ አገልግሎትና የተለያዩ የጂኦቴክኒክ የማማከር ስራዎችን የሚሰራው የኢትዮጵያ ጆኦሎጂካል ሰርቬይ ነው፡፡

የመስሪያ ቤቱ ዋና ዳይሬክተር የሆኑት አቶ ማስረሻ ገ/ስላሴ እንደገለፁት በተደረገው የ5 ዓመት እንቅስቃሴ በ2003 መጀመሪያ ላይ 51 በመቶ የነበረው የመሰረታዊ ጂኦሳይንስ መረጃ ሽፋን በ2007 መጨረሻ 82.4 በመቶ ለማድረስ ተችሏል ብለዋል፡፡

የማዕድን ልማትና ሌሎች የኢኮኖሚ ዘርፎች የሚቀርበውን የጂኦሳይንስ ጥናት መረጃዎች በጥራት እና በአይነት የበለጠ ለማሻሻል እየጣረ ይገኛል ሲሉም ገልፀዋል፡፡

የሰርቬይ መስሪያ ቤቱ ከውጭ ሀገር የሚገኙ አጋር ድርጅቶች የሳይንሳዊ መሳሪያዎችን በማግኘት ላይ በመሆኑ የግብዓት አቅርቦቶች በእጅጉ እየተሻሻሉና በስራ ላይ እየዋሉ ይገኛሉ ሲሉ ተናግረዋል፡፡ በሀገራት ላይ እየተስፋፋ በመጣው የማዕድን ፍለጋና ልማት በሰለጠኑ ባለሞያዎች ለማሰራት ከፍተኛ የሆነ የሰው ሃይል እጥረት እንዳለባቸውም ተናግረዋል፡፡

ሰኔ 19/2007 ዓ.ም

ሰላማዊ ሰልፉ በ13 ኤምባሲዎች፣ በአውሮፓ ህብረትና በአፍሪካ ህብረት በኤርትራ ያለውን ጉዳይ እንዲመረምርና እርምጃ እንዲወስድ የሚያሳስብ ደብዳቤ አስገብተዋል፡፡ “ኢሳያስ አፈወርቂ ለፍርድ ይቅረብ”፣ “የሰብዓዊ መብት ጥሰት ይቁም” እና “እርምጃ ይወሰድ” የሚሉ መፈክሮች ይዘው ወጥተዋል፡፡

ከአዲስ አበባ በተጨማሪ አዲሃሪሽ፣ ሸመልባይ፣ መአይ አይኒ እና ህንፃፅ በሚገኙ በትግራይ አራት የስደተኛ ካምፖች የሚገኙ ኤርትራዊያን እንዲሁም በአፋር፣ አሳይታ እና በረሃሌ የሚገኙ ስደተኞች በዛሬው እለት ሰልፍ ወጥተዋል፡፡ በአጠቃላይ በኢትዮጵያ 90ሺ የሚሆኑ ኤርትራዊያን ሰላማዊ ሰልፍ የወጡ ሲሆን ተመሳሳይ ሰላማዊ ሰልፉ ትላንት በአውስትራሊያ ተካሂዷል፤ ዛሬም በጄኔቫ ይካሄዳል፡፡ (ሰላም ተሾመ)

ሰኔ 18/2007 ዓ.ም

በአፍሪካ የመጀመሪውያው እና ብቸኛው ወደ ምዕራብ አሜሪካ የቀጥታ በረራ የሚደረግ የአየር መንገድ የኢትዮጵያ አየር መንገድ መሆኑም ተገልጧል፡፡ በሎስአንጀለስ የሚገኘው የኢትዮጵያ አየር መንገድ ምክትል ስራ አስኪያጅ የሆኑት አቶ ሳምሶን መንግስቱ እንደገለፁት በየዓመቱ 44 ሚሊዮን ቱሪስቶች ወደ ሎስአንጀለስ ከተማ ይመጣሉ ብለዋል፡፡

ይህ የቀጥታ በረራ መጀመሩ ለኢትዮጵያ የቱሪስት ፍሰቱን በከፍተኛ ሁኔታ ያሳድገዋል፤ የንግድ እንቅስቃሴው ላይም የራሱን የሆነ ትልቅ አስተዋፅኦ ያበረክታል ሲሉ ተናግረዋል፡፡

ኢትዮጵያንም ሆነ ሎስአንጀለስን የሚጎበኙ ቱሪስቶች ቁጥር እንዲጨምር እና መንገደኞች የኢትዮጵያ አየር መንገድን እንዲመርጡ የተለያዩ ስራዎች እየተሰሩ መሆናቸውን ተናግረዋል፡፡

አያይዘውም የሁለቱን ሀገራት ግንኙነት ለማጠናከር ይህ የቀጥታ በረራ መጀመር ትልቅ ድርሻ አለው ሲሉም ተናግረዋል፡፡ (ኤልሳ ሙልጌታ)

ሰኔ 17/2007 ዓ.ም

በአዋጅ ቁጥር 555/2000 እንደ አዲስ የተቋቋመው የመንግሥት ቤቶች ኤጀንሲ በአዲስ አበባና በድሬዳዋ ከተማ የሚያስተዳድራቸውን ቤቶች በተመለከተ የቤቶች አስተዳደር መመሪያ ቁጥር 41/2007 በተግባር ላይ አውሏል፡፡ የጥገና፣ እድሳትና የቤቶች ኪራይ ተመንም በመመሪያ ተሻሽሏል፡፡

በዚህም መሰረት በአሁን ወቅት የሚገኙ ቤቶቹን ለመንግሥት የተወሰነላቸው ሃላፊዎች፣ ለፌዴራል መንግሥት ተš_ሚዎች፣ ኮሚሽነሮች እና ከክልል ለሚመጡ ባለስልጣኖች ማረፊያነት እንደሚያውል ለዛሚ 90.7 ኤፍ ኤም የገለፁት የኤጀንሲው የህግ ጉዳዮች የስራ ሂደት ባለቤት አቶ አዳም ሹቤ ናቸው፡፡ በተጨማሪም ለ547 የህዝብ ተወካዮች ም/ቤት አባላት የቤት አቅርቦት ስራ እንደሚሰሩም ተናግረዋል፡፡ ቀድሞ በነበረው አሰራር ለማንኛውም ሰው የማከራየት ሂደቱ መቋረጡንም ጨምረው አስታውቀዋል፡፡ (ታሪክ አዱኛ)

ሰኔ 17/2007 ዓ.ም

በበጎ ፈቃደኞች ኢትዮጵያዊያን እና በዚህ ህመም የተጠቁ ልጆች ወላጆች ያቋቋሙት እና ዘንድሮ 20ኛ ዓመቱን የደፈነው የኢትዮጵያ የአእምሮ እድገት ውስንነት ብሔራዊ ማህበር የተለያዩ ስራዎችን እየሰራ እና በህመሙ የተያዙ ልጆችን እያገዘ እንደሚገኝ ነው የተነገረው፡፡ ማህበሩ በዋናነት በስሩ ያሉ ልጆች የሙያ ስልጠናዎችን በተለያዩ ዘርፎች እንዲያገኙ ማድረግ፣ በየጉዳታቸው መጠን በመለየት የህይወት ክህሎት ስልጠናዎችን መስጠትና ሌሎች የህክምናና የማገገሚያ ስራዎችን መስራት የሚጠቀሱ ሲሆን፤ በተለይ በሙያ ስልጠናዎች በርካቶችን እንዳበቃም ተሰምቷል፡፡

የማህበሩ ስራ አስኪያጅ ወ/ሮ ምህረት ንጉሴ ለዛሚ 90.7 ኤፍ ኤም እንደተናገሩት ወደ 50 የሚጠጉ ልጆችን በተለያዩ የሙያ ስልጠናዎች አሰልጥነን ብናበቃም ምንም ተቋም ግን እነዚህን ባለሞያዎች ተቀብሎ ለማሰራት አልፈቀደም ብለዋል፡፡ እነሱ በብቃት የሚሰሯቸው እና የሰለጠኑባቸውም ጭምር የሙያ ክህሎቶች እና ስራዎች ቢኖሩም እስካሁን ግን ከሁለት አባላቶቻችን ውጪ ስራ የያዘልን እና ተቋማት የተበቀሉን ልጆች የሉም ሲሉም ስራ አስኪያጇ ተናግረዋል፡፡ (ያልፋል አሻግር)

ሰኔ 17/2007 ዓ.ም

ለአንድ ሀገር ኢኮኖሚያዊ እድገት የገቢና የወጪ ንግድ እቃዎች ጉልህ ድርሻ ቢኖራቸውም ስርዓቱን ያልጠበቀ ሂደትን የማያስተናግድ ከሆነ ጉዳቱ እንደሚያመዝን ነው የተገለፀው፡፡ በእለት ተእለት የሰዎች እንቅስቃሴዎች ውስጥ ማህበረሰቡ የሚገለገልባቸው ቁሶች ደረጃቸውን ሳይጠብቁ ህጋዊ በመምሰል በህጋዊ መልኩ በጉምሩክ በኩል እየገቡ መሆናቸውን የገለፁት የንግድ ውድድርና ሸማቾች ጥበቃ ባለስልጣን የመረጃ ትንተና የገበያ ጥናት ዳይሬክቶሬት ዳይሬክተር አቶ ኢቲሳ ደሜ ናቸው፡፡ ለዚህ ችግር ዋነኛ ምክንያት የክትትልና የቁጥጥር ማነስና ተገቢው የላብራቶሪ አገልግሎት መስጫ ማዕከል አለመኖር በመሆኑም በዋናነት ተጠቅሷል፡፡ (ነጋሽ በዳዳ)

ሰኔ 15/2007 ዓ.ም

በብቸኝነት የተወዳደረው ቤንሻንጉል ጉምዝ ህዝቦች ዴሞክራሲያዊ ፓርቲ በ9 የምርጫ ክልሎች አሸንፏል፡፡ አብዴፓ በ8 የምርጫ ክልሎች፣ ኢሶዴፓ በ24 የምርጫ ክልሎች፣ ጋህዴን በ3 የምርጫ ክልሎች ተወዳድረው በሁሉም አሸንፏል፡፡

ከ547 መቀመጫ ኢህአዴግ በ5 ክልሎችና ሁለት ከተማ አስተዳደሮች በ500 ወንበሮች ማሸነፉን የኢትዮጵያ ብሔራዊ ምርጫ ቦርድ ፅ/ቤት ሰብሳቢ ፕ/ር መርጋ በቃና አስታውቀዋል፡፡

ኢህአዴግ በትግራይ በ38 ክልሎች፤ በአማራ በ137 ክልሎች፤ ኦሮሚያ በ178 ክልሎች፤ በደ/ብ/ብ/ህዝቦች በ122 ክልሎች፤ በሀረሪ በ1 ክልል፤ በአዲስ አበባ በ23 ክልሎች እንዲሁም በድሬዳዋ በ1 ክልል አሸንፏል፡፡

በሀገር አቀፍ ደረጃ መድረክ 2ኛ፤ ሰማያዊ ፓርቲ 3ኛ ሆነው ማጠናቀቃቸው ሲገለፅ በደቡብ ብሔር ብሔረሰብ ህዝቦች ክልል የጊምቦ ገዋታ ምርጫ ክልል ውጤት ተጠናቆ ለቦርዱ ቀርቦ ባለመፅደቁ እንዳልተካተተ ተገልጧል፡፡ (ነጋሽ በዳዳ)