አገር አቀፍ ዜናዎች

ነሐሴ 26/2007 ዓ.ም

ከአዳማ ቡና ነው በማለት ፍቃድ ሳይኖረው 460 ኩንታል ጤፍ ጭኖ ከገቢዎችና ጉሙሩክ ባለስልጣን ተፈትሻ_ል የሚል እና የኢትዮጵያ የቡና ጥራት ሀሰተኛ ማረጋገጫን በመያዝ  በቮልቮ  ኮድ 3/ 00265  ተሳቢ እና በኮድ 3/01111 ተሸከርካሪ ጭኖ ወደ ጅቡቲ መስመር ሲጓዝ የነበረው ተከሳሽ ሃይለማርያም ተክሉ ኤርሙካሌ ላይ በቁጥጥር ስር ውሏል፡፡

ተከሳሹም በፈፀመው ወንጀል በፌዴራል ከፍተኛ ፍ/ቤት ድሬዳዋ ምድብ ወንጀል ችሎች ጥፋተኛ ተብሎ በ10 ዓመት ፅኑ እስራት እንዲቀጣ ተወስኖበታል፡፡

በተጨማሪም 460 መቶ ኩንታል ጤፍና በእጁ ላይ የተገኘው 4.700  የአሜሪካ ዶላር ለመንግሥት ገቢ ተደርጓል ሲሉ የስነ-ምግባርና ፀረ-ሙስና ኮሚሽን ድሬዳዋ ቅርንጫፍ ፅ/ቤት ሃላፊ አቶ ሰለሞን አያሌው ለዛሚ 90.7 ኤፍ ኤም ገልፀዋል፡፡ (ታሪክ አዱኛ)

ነሐሴ 25/2007 ዓ.ም

በበዓሉ ምሁራን፣ አርቲስቶችና የሰራዊት አባላት የነበሩ ኤርትራውያን የተገኙ ሲሆን በአምባገነን ስርዓት የምንወዳት ሀገራችንና ቤተሰቦቻችንንትተን ለስደት ተዳርገናል ሲሉ ተናግረዋል፡፡ በኤርትራ ረሀብና የግፍ አገዛዝ በመኖሩ ለስደት እንደተጋለጡም ገልጸዋል፡፡ በተለይ የኢትዮጵያ ህዝብ ከ180ሺ ኤርትራውያን በእኩልነትና የትምህርት እድል እየሰጠ አስጠልሎ እንዳለ የኢትዮጵያ መንግስትና ህዝብ ሻዓብያ እንደሚለው ሳይሆን የኤርትራን ህዝብ ወዳጅና የቁርጥ ቀን ደጋፊ መሆኑ መታወቅ አለበት ብለዋል፡፡ቀጥለውም ኤርትራውያን በሀገራቸው ያላገኙትን ነጻነት፣ የስራ ዕድል እንዲሁም የትምህርት እድል ማግኘታቸውን ተናግረዋል፡፡ በመድረኩ የተለያዩ ድራማዎችና ዘፈኖች ቀርበዋል፡፡ በመጨረሻ ሁሉም ኤርትራዊ ለሁለቱም ህዝቦች ሰላም፣ ብልጽግና እና መልካም ጉርብትና መስራት እንዳለበት ተሳታፊዎቹ አሳስበዋል፡፡ (ሰላም ተሾመ)

ነሐሴ 25/2007 ዓ.ም

ጉባኤዉ ክቡር አቶ ኃይለማሪያም ደሳለኝን የድርጅቱ ሊቀመንበር እንዲሁም ክቡር አቶ ደመቀ መኮንን ም/ሊቀመንበር አድርጎ መርጧቸዋል። ጉባኤዉ ከሊቃነመናብርት በተጨማሪ የቁጥጥር ኮሚሽን አመራሮች ምርጫንም አካሂዷል።

በዚህም መሰረት ከብአዴን አቶ አወቀ ኃይለማሪያንም ዋና ሰብሳቢ፣ ከደኢህዴን አቶ ተፈራ ሞላን ምክትል ዋና ሰብሳቢ እና ከኦህዴድ አቶ ጌታቸዉ ባልቻን ጸሐፊ አድርጎ መርጧቸዋል።
የድርጅቱ ሊቀመንበር ክቡር አቶ ኃይለማሪያ ደሳለኝ ባደረጉት የማጠቃለያ ንግግራቸዉ በ10ኛ የኢህአዴግ ጉባኤ የተቀመጡ አቅጣጫዎችንና የተወሰኑ ውሳኔዎችን በፍጥነት ተግባራዊ በማደረግ ሕዘቡ በ5ኛ አገራዊ ምርጫ ወቅት የሰጠዉን ትልቅ ኃላፊነት እንዲወጡ ለድርጅቱ አባላትና አመራር አካላት ጥሪያቸዉን አቅርበዋል።

ድርጅቱ ያስተላለፋቸው ትላልቅ ውሳኔዎችን ተግባራዊ ለማድረግ የነቃ የሕዝብ ተሳትፎ ወሳኝ መሆኑን የተናገሩት ክቡር ጠቀላይ ሚኒስትር ሕብረተሰቡ የጉባኤ ውሳኔዎችን መሰረት በማድረግ በየደረጃዉ በሚከናወኑ ተግባራት የነቃ ተሳፏቸዉና ድጋፋቸዉ አንዳይለይም ነዉ ጥሪ ያስተላለፉት። ሰላማዊ የትግል መንገድን በመከተል የተሻለ አመራጭ አለን ከሚሉ ተቃዋሚ የፖለቲካ ፓርቲዎች ጋርም በሚያስማሙ ጉዳዮች በጋራ በመሰራት፤ በማያስማሙ ጉዳዮች ሰላማዊ ትግል በማድረግ ለአገራችንና ለሕዝባችን ጥቅም በጋራ መሥራት ይገባናል ብለዋል ክቡር ጠቀላይ ሚኒስትሩ፡፡

ነሐሴ 22/2007 ዓ.ም

የጫት ነጋዴዋን ወ/ሮ የፌዴራል ስነ-ምግርና ፀረ-ሙስና ኮሚሽን ድሬዳዋ ቅርንጫፍ የውስጥ ክትትል ሰራተኛ ነኝ በማለትና የሌላ ሰራተኛ ስምን ጠቅሶ ራሱ እንደሆነ በማሳመን የማታለል ወንጀል ፈፅሟል ተብሎ በቁጥጥር ስር የዋለው ግለሰብ ብርሀነ ዘነበ ይባላል፡፡ ግለሰቧን ከተዋወቀ በኋላ በምስራቅ ሀረርጌ ኮምቦልቻ ወረዳ ፍ/ቤት በአባትሽ ይዞታ ጉዳይ የተወሰነብሽ ያለአግባብ ነው በማለት እኔ ብዙ ያለአግባብ የሚወሰኑ ዳኞችን አስቀጥቻለው፤ ያንችንም አስቀጣልሻለው፤ በድጋሚ እንዲታይልሽም አደርጋለው በማለት ከምትነግድበት የጫት ሱቅ በየቀኑ ጫትና 200 ብር የወሰደ ሲሆን ግለሰቧ ጉዳዩ ሳይሳካ በመዘግየቱ ምክንያት በነሀሴ 19 ቀን 2007 ዓ.ም ወደ የስነ-ምግባርና ፀረ-ሙስና ኮሚሽን ድሬዳዋ ቅርንጫፍ በማቅናት ላይ ነኝ ብሎ የጠቀሰላትን ሰራተኛ ስም በምትጠይቅበት ወቅት የቀረበው ሰራተኛ በአካል ባለመመሳሰሉ ምክንያት ጥቆማ የሰጠች ሲሆን በጥቆማው መሰረት ክትትል በማድረግ በተከራየበት መኖሪያ ቤት በቁጥጥር ስር ሊውል ችሏል፡፡

በቤቱ ውስጥ በተደረገው ፍተሻ የመከላከያ ሰራዊት ልብስ የተገኘ ሲሆን ተጨማሪ የፍርድ ቤት ጉዳይ የሚመለከት በትግሪኛ ቋንቋ የተፃፈ ማስታወሻ ማግኘታውን እና ሌሎች ሰዎችንም በተለያዩ ጊዜያት ወታደር ነኝ እያለ ማታለሉን ለዛሚ 90.7 ኤፍ ኤም የገለፁት የቅርንጫፍ ፅ/ቤቱ ሀላፊ አቶ ሰለሞን አያሌው ናቸው፡፡ ህብረተሰቡ በተቋማትና በሰራተኞች ስም እየተዘዋወሩ የሚያታልሉ አካላትን ሊከላከል እንደሚገባ መልዕክታቸውን አስተላልፈዋል፡፡ (ታሪክ አዱኛ)

ነሐሴ 22/2007 ዓ.ም

ከሁለት ዓመት በፊት ዘጠነኛው መደበኛ ጉባኤ በአማራ ክልል ባህርዳር ከተማ መካሄዱ የሚታወስ ነው፡፡ ዘንድሮም 10ኛውን ድርጅታዊ ጉባኤ እንዲያስተናግድ የተመረጠው ህዝባዊ ወያነ ሃርነት ትግራይ (ህ.ወ.ሃ.ት) ቅድመ ዝግጅቱን በመቀሌ ከተማ ሲያካሄድ ቆይቷል፡፡ በዛሬው እለትም በመቐለ ሰማዕታት አዳራሽ ጉባኤው ተከፍቷል፡፡ የኢህአዴግ ሊቀመንበር እና የኢፌዴሪ ጠቅላይ ሚኒስትር አቶ ሃ/ማርያም ደሳለኝን ጨምሮ ከፍተኛ የመንግስት ባለስልጣናት፣ ጥሪ የተደረገላቸው እንግዶች፣ የአጋር ድርጅት አመራሮች፣ ዲፕሎማቶች እና አምባሳደሮች በስነ-ስርዓቱ ላይ ታድመዋል፡፡

የኢፌዴሪ ጠቅላይ ሚኒስትር አቶ ሃ/ማርያም ደሳለኝ በመክፈቻው እንደገለፁት ካለፉት ጉባኤዎች መካከል በ1993 ዓ.ም የተካሄደውና 4ኛው ድርጅታዊ ጉባኤ ፓርቲው በውስጡ የተደቀነበትን የመበስበስ እና የጥገኝነት ዝቅጠት አደጋ በበቂ ጥናትና ትግል ተመርቶ የድርጅቱን የትግል መስመር በማጥራት የተሃድሶ አቅጣጫዎችን በጥራት በማስቀመጥ ወደ አዲስ የታሪክ ምዕራፍ የተሸጋገረበት ታሪካዊ ጉባኤ ነበር፡፡

ጠቅላይ ሚኒስትሩ አየይዘውም ዛሬ በተጀመረው 10ኛው ድርጅታዊ ጉባኤ የህዳሴ ጉዟችንን ለማስቀጠል ወሳኝ ወቅት ላይ ነን፤ ባለፉት ሁለት ተከታታይ ጉባኤዎች ቁልፍ ትኩረት የተሰጠውን የመጀመሪያው የእድገትና ትራንስፎርሜሽን እቅድ ፈፅመን 2ኛውን ለመተግበር በዝግጅት ላይ ባለንበት ወቅት የሚካሄድ ነው ካሉ በኋላ በዚህ አጋጣሚ ህዝባችን ምክንያታዊ በሆነ በሳል ውሳኔ ሙሉ ድጋፉን ለድርጅታችን በመስጠቱ በድርጅታችን አባላት እና በ10ኛው ድርጅታዊ ጉባኤ ስም ያለኝን ክብር እና ምስጋና ለመግለፅ እወዳለሁ ብለዋል፡፡ ጉባኤያችንም ይህንን አደራ መወጣት የሚያስችሉ አቅጣጫዎችንና ውሳኔዎችን እንደሚያስተላልፍ ይጠበቃል ሲሉ ተናግረዋል፡፡

አጋር ድርጅቶችም በተወካዮቻቸው አማካኝነት መልዕክቶቻቸውን ያስተላለፉ ሲሆን እስከ ነሐሴ 25 በሚቆየው በዚህ ጉባኤ ከተለያዩ የውጭ ሀገራት የመጡ የፖለቲካ ፓርቲ አመራሮችና ተወካዮች እየተሳተፉበት ይገኛሉ፡፡ (ሱራፌል ዘላለም)

ነሐሴ 21/2007 ዓ.ም

“ጳጉሜ ለጤና” በሚል መርህ በጳጉሜ ወር ከመንግሥት የህክምና ማዕከላት ጋር በመተባበር የሲቲ ስካን እና የኤም አር አይ ምርመራ እንዲያደርጉ የሀኪም የትዕዛዝ ወረቀት ተሰጥቷቸውና ህክምናው የሚጠይቀውን ገንዘብ ለመክፈል አቅም ለሌላቸው ታካሚዎች ነፃ የምርመራ አገልግሎት እንደሚሰጥ የማዕከሉ ማኔጂንግ ዳይሬክተር አቶ ዳዊት ሃይሉ ገልፀዋል፡፡

በአዲስ አበባ ቴዎድሮስ አደባባይ ጀርባ ኤም ኬ ህንፃ ላይና አሮጌው ቄራ ንግድ ማተሚያ ፊት ለፊት በሚገኘው የውዳሴ ዲያግኖስቲክ ማዕከል ለሚሰጠው የምርመራ አገልግሎት ምዝገባም ተጀመሯል፡፡ የተመዝጋቢዎች ቁጥር እስኪጠናቀቅም ምርመራው ይቀጥላል፡፡ (ታሪክ አዱኛ)  

ነሐሴ 21/2007 ዓ.ም

እያሱ ገረመው ከበደ ሰኔ 17 ቀን 2006 ዓ.ም  ከረፋዱ 4፡00 ሰዓት ሲሆን በልደታ ክፍለ ከተማ በቀበሌ 07/14 ክልል ልዩ ቦታው ጥቁር አንበሳ ሆስፒታል የተማሪዎች መኝታ ክፍል ውስጥ ንብረትነቱ የግል ተበዳይ ዶ/ር የሆነውን ላፕቶፕ በአጠቃላይ ግምቱ 11,450 ብር (አስራ አንድ ሺህ አራት መቶ ሃምሳ ብር) የሚገመት ንብረት አንስቶ የወሰደ ሲሆን፤ ተከሳሽ ሲራጅ ረሺድ አህመድ ዕቃው የተሰረቀ ንብረት መሆኑን እያወቀ በአዲስ ከተማ ክ/ከተማ ወረዳ 08 ክልል ልዩ ቦታው አንዋር መስኪድ አካባቢ በመገናኘት በብር 4,500 (አራት ሺህ አምስት መቶ ብር) የገዛ በመሆኑ በ1996 ዓ.ም የወጣውን ወንጀል ህግ አንቀጽ 662/3/ ስር የተመለከተውን በመተላለፍ በፈፀመው በቸልተኝነት መሸሸግ ወንጀል ተከሷል፡፡

ክሱን የተመለከተው የፌዴራል የመጀመሪያ ፍ/ቤት አቃቢ ህግ ያቀረበውን የሰውና የሰነድ ማስረጃን መርምሮ ጥፋተኛ ነው በማለት በ6 ዓመት ጽኑ እስራት እንዲቀጣ ወስኖበታል፡፡ (ታሪክ አዱኛ)

ነሐሴ 18/2007 ዓ.ም

“ሀበሻ አዲስ ዓመት ኤክስፖ 2008” “ኢትዮጵያን በማስተዋወቅ ቀጣይነት ያለው ኢኮኖሚያችንን እንገንባ” በሚል መሪ ቃል እስከ ጳጉሜ 6 ቀን 2007ዓ.ም ድረስ ሊቆይ ያሳለፍነው ቅዳሜ ነሐሴ 16 በኤግዚቢሽን ማዕከል ተከፍቷል፡፡ በኤክስፖው ላይ በዓለም ትልቁ ሻማ በዛፍ ቅርፅ ተሰርቶ የቀረበ ሲሆን በአለም ትልቁ ፖስትካርድም በመዘጋጀት ላይ ነው፡፡ ሻማውንና ፖስትካርዱንም በአለም ድንቃ ድንቅ መዝገብ ላይ ለማስመዝገብ ጥረት ይደረጋል ተብሏል፡፡

የሻማው ዛፍ 10 ሜትር ርዝመት ያለው ሲሆን 450 ኪ.ግ ሰም እንዲሁም ሰርቶ ለማጠናቀቅም ከአንድ ወር ከ15 ቀን በላይ ፈጅቷል፡፡

ዛፉን ሲቆርጥ የሚታይ የሰው ቅርፅም በሻማ ከዛፉ ጋር አብሮ የተሰራ ሲሆን “ዛፎች ሲቀልጡ(ሲጠፉ) እኛም አብረን እንቀልጣለን (እንጠፋለን)” የሚል መልዕክትን በመያዝ በአካባቢ ጥበቃ ዙሪያ ግንዛቤ ለመፍጠር ታስቦ የተዘጋጀም ነው፡፡

ነሐሴ 18/2007 ዓ.ም

የሀገር አቀፍ የትምህርት ምዘናና ፈተናዎች ኤጀንሲ ወደ መንግስት ዩኒቨርሲቲዎች መግቢያ ነጥብን ተናግረዋል። በዚህም ወደ መንግስት ዩኒቨርሲቲዎች በመደበኛ፣ በቀንና በማታ መግቢያ ነጥብ ፣ ለተፈጥሮ ሳይንስ ወንዶች 343 እና ከዚያ በላይ ፣ ለሴቶች መግቢያ ነጥብ 320 እና ከዚያ በላይ እንዲሆን ተወስኗል ። ለግል ተፈታኞች ደግሞ ለወንዶች 353 እና ከዚያ በላይ ፣ ለሴቶች ደግሞ 331 እና ከዚያ በላይ ሆኗል ። ለታዳጊ ክልሎችና ለአርብቶ አደር አካባቢ ተማሪዎች ለወንዶች 332 እና ከዚያ በላይ ሲሆን፥ ለሴቶች ደግሞ 317 እና ከዚያ በላይ እንዲሆን ተወስኗል። በተፈጥሮ ሳይንስ መስማት ለተሳናቸው ተማሪዎች መግቢያ ነጥቡ 297 እና ከዚያ በላይ እንዲሆን በማህበራዊ ሳይንስ በመደበኛ እና በማታው መርሀ ግብር ወደ መንግስት ዩኒቨርሲቲዎች ለመግባት ለወንዶች 322 እና ከዚያ በላይ ፤ ለሴቶች ደግሞ 302 እና ከዚያ በላይ ነው። ለግል ተፈታኞች ለወንዶች 330 እና ከዚያ በላይ ለሴቶች 310 እና ከዚያ በላይ ነጥብ ተቀምጧል። ለታዳጊ ክልሎችና ለአርብቶ አደር አካባቢ ተማሪዎች 310 እና ከዚያ በላይ ለወንዶች መግቢያ ነጥብ ሲሆን፥ ለሴቶች 295 ነጥብ እና ከዚያ በላይ ነጥብ ይጠበቃል። በማህበራዊ ሳይንስ መስማት ለተሳናቸው 275 እና ከዚያ በላይ ሲሆን፥ ለአይነ ስውራን 230 እና ከዚያ በላይ ሆኗል። በርቀት ለመማርና በግል ዩኒቨርሲቲዎች ለመማር የሚፈልጉ ተማሪዎች 275 እና ከዚያ በላይ ውጤት ማምጣት ይጠበቅባቸዋል ኤጀንሲው በድረ-ገፁ እንዳስታወቀው፡፡

ነሐሴ 13/2007 ዓ.ም

በጠቅላይ ሚኒስትር ኃይለማሪያም የሚመራው ከፍተኛ ልዑክ ወደ ኪጋሊ ያመራው "ዴሞክራሲያዊ ልማታዊ መንግሥት በአፍሪካ" በሚል መርህ የጠቅላይ ሚኒስትር መለስ ዜናዊን ሦስተኛ ሙት ዓመት ለማስታወስ በተዘጋጀው ዓለም ዓቀፍ መድረክ ላይ ለመሳተፍ ነው።

መድረኩን ያዘጋጁት የመለስ ዜናዊ ፋውንዴሽን፣ የሩዋንዳ መንግሥትና የአፍሪካ ልማት ባንክ ናቸው።

በመድረኩ ላይ የኡጋንዳው ፕሬዚዳንት ዩዌሪ ካጉታ ሙሴቬኒና የጋናው ፕሬዚዳንት ጆን ድራማኒ ማሃማን ጨምሮ የበርካታ የአፍሪካ አገራት መሪዎች ይሳተፋሉ ተብሎ ይጠበቃል። 

የመለስ ዜናዊ ፋውንዴሽን ታላቁን መሪ ለማስታወስ የጂቡቲው ፕሬዚዳንት እስማኤል ኦማር ጌሌህ፣ የሱዳኑ ፕሬዚዳንት ኦማር ሐሰን አልበሽር፣ የሶማሊያው ጠቅላይ ሚኒስትር አብዲ ፋራህ ሺርዶን፣ የኡጋንዳው ፕሬዚዳንት ዩዌሪ ካጉታ ሙሴቬኒና የአፍሪካ ህብረት ኮሚሽን ሊቀመንበር ዲላሚኒ ዙማ በተገኙበት የተቋቋመው በሚያዝያ ወር 2005 በአዲስ አበባ ነው።

-    ምንጭ- ኢዜአ

ነሐሴ 04/2007 ዓ.ም

ቀድሞ የነበረው የጠበቆች ቁጥር በ2007 ዓ.ም ከፍ ማለቱ ተገለጧል፡፡ ጠበቆች በሚያደርጉት እንቅስቃሴ ቁጥጥር እንደሚደረግ ለዛሚ 90.7 ኤፍ ኤም የገለፁት አቶ ፍቃዱ ደምሴ የፍትህ ሚኒስቴር የጥብቅና ፍቃድና ቁጥጥር ዳይሬክቶሬት ዳይሬክተር ናቸው፡፡

በስነ-ምግባር ጉድለት ምክንያት 200 ጠበቆችን ከ1 ዓመት እስከ 2 ዓመት እንዲሁም የገንዘብና ፍቃድ የመንጠቅ ቅጣት ማስተላለፋቸውን ገልፀዋል፡፡ ለፍትህ ስርዓቱ እንቅፋት የሚሆኑ ጠበቆችን የመቆጣጠር ሂደቱ ይቀጥላል ብለዋል፡፡

ለ2008 ዓ.ም የጥብቅና ፍቃድ ለማግኘት የተመዘገቡ ጠበቆች ቁጥር ከፍ ማለቱን የተናገሩት ዳይሬክተሩ ለተመዝጋቢዎቹ የምዘና ምዝገባ ቅድመ ዝግጅት ማጠናቀቃቸውን ገልፀዋል፡፡ እስከ መስከረም 30 ባለው ጊዜ ውስጥ ፈተናውን እንደሚሰጡም ተናግረዋል፡፡ (ታሪክ አዱኛ)

ሐምሌ 29/2007 ዓ.ም

የኢትዮጵያ ኦርቶዶክስ ተዋህዶእምነት ተከታዮች ከነሐሴ 1-15 የሚፆሙትን መዋዕለ ፆም አስመልክተው ብፁዕ ወቅዱስ አቡነ ማቲያስ ቀዳማዊ ፓትሪያርክ ርዕሰ ሊቃነ-ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለሃይማኖት ባስተላለፉት የቡራኬ መልዕክት እንደገለፁት የሀገራችንን ታላቅነትና ነፃነት፣ አንድነትና ሉዓላዊነት፣ ታሪክና ባህል እንዲሁም ቅዱስ ስነ-ምግባር ጠብቆ በማስጠበቅ ዛሬ በዓለም ዙሪያ ልዩ አድናቆት ላላት ሀገር ባለቤት ያደረገን ፅኑ እምነታችን መሆኑ አይዘነጋም ብለዋል፡፡

ፓትሪያርኩ አያይዘውም ከሃይማኖታችን፣ ከባህላችን፣ ከቅዱሳን መፃህፍት አስተምህሮና ከህገ-ተፈጥሮ  ውጭ የሆነን ነውረ ሃጢያት ከሌላው ሀገር ወደ ሀገራችን ለማጋባት የሚደረገውን ተፅእኖ ህዝቡና ምዕመናን አምርረው ሊታገሉና ሊመክቱ ይገባል ብለዋል፡፡ (እንደገና ደሳለኝ)

ሐምሌ 28/2007 ዓ.ም

በሀረር ከተማ በቀበሌ 10 በተለምዶ ሞቢል ማደያ ተብሎ በሚጠራው አካባቢ ነዋሪ የሆኑ 2 ወጣቶች ህይወታቸው ማለፉን ለዛሚ 90.7 ኤፍ ኤም የገለፁት የሀረር ከተማ ኮሙኒኬሽን ጉዳዮች የስራ ሂደት ባለቤት ወ/ሪት ሃናን መሀመድ ናቸው፡፡

ወጣቶቹ ተከራይተው በሚኖሩበት ቤት ውስጥ ከትናንት በስቲያ ማምሻውን ብርዱን ለመከላከል የከሰል እሳት አቀጣጥለው በእንግድነት ቤታቸው ከመጣው አንድ ጓደኛቸው ጋር እየተጫወቱ በዛው እንቅልፍ በመተኛታቸው በጭሱ ምክንያት ህይወታቸው ሊያልፍ መቻሉን ገልፀዋል፡፡ በእንግድነት በቤታቸው የነበረው አንዱ ጓደኛቸው ግን በአካባቢው ህብረተሰብ እርዳታ ህይወቱ ሊተርፍ መቻሉን ተናግረዋል፡፡ የተረፈው ወጣት ለፖሊስ በሰጠው ቃል ማታ እሳቱን እየሞቁ ሲጫወቱ እንደነበር ገልጧል፡፡ ሁለቱ ሟች ወጣቶች የምግብ ቤት ባለሞያዎች እንደነበሩ ያስታወሱት ሃላፊዋ በዛሬው እለትም የቀብር ስነ-ስርዓታቸው መፈፀሙን ገልፀዋል፡፡ (ታሪክ አዱኛ)

ሐምሌ 24/2007 ዓ.ም

በሀገሪቱ መንግሥት ስር የሚተዳደረው ኢትዮ ቴሌኮም ዋና ድረ-ገፅ ላይ ከትላንት ወዲያ ሳሚ ቺቺሮቮ በተባለው ሰው ተጠልፏል የሚል ፅሁፍ ከላይ ሲፃፍ በገፁ ግርጌ ላይ ሳይደርስ ደግሞ አልጄሪያ ይልና (where is security?) ደህንነት የት አለ? ሲል ይጠይቃል፡፡

ማንነቱ በማይታወቅ ሰው ኢትዮ ቴሌኮም ተጠልፏል ወይ ብለን ለኢትዮ ቴሌኮም የህዝብና ዓለም አቀፍ ግንኙነት ሃላፊ አቶ አብዱራሂም አህመድ ደውለንላቸው ‹‹ውሸት ነው›› የሚል መልስ ከሰጡን በኋላ መጠለፉን መመልከታችንን እና በተጠለፈበት ሰዓትም ድረ-ገፁን ፎቶ (Screen Shot) ማንሳታችንን ስናረጋግጥላቸው በጥገና ወቅት እንዲህ ያሉ ችግሮች ያጋጥማሉ ሲሉ መልሳቸውን ቀልብሰዋል፡፡ አሁን ላይ ዋና ድረ-ገፁ የተለመደውን አገልግሎቱን እየሰጠ እንደሚገኝ ድረ-ገፁ ራሱ ይመሰክራል፡፡ (ሰለሞን ፀጋዬ)

ሐምሌ 23/2007 ዓ.ም

በነሃሴ ወር 2004 ዓ.ም በፌዴራል አቃቤ ህግ ክስ የተመሰረተበት የማስተዋል ህትመት ማስታወቂያ ድርጅት በየሳምንቱ ይታተም በነበረው ፍትህ ጋዜጣ እና የፋክት መፅሄት አዘጋጅ ጋዜጠኛ ተመስገን ደሳለኝ ክሱን ሲከራከር ቆይቶ በጥቅምት 17 2007 ዓ.ም በፌዴራል ከፍተኛ ፍ/ቤት 9ኛ ወንጀል ችሎት በ3 ዓመት ፅኑ እስራት እንዲቀታ መወሰኑ ይታወሳል፡፡ በወቅቱም የተከሳሹ ጠበቃ ጋዜጠኛውን በእስራት መቅጣት በህገ-መንግሥቱ የተፈቀደውን የመፃፍና የመናገርን መብት መጣስ እንደሆነ ተናግሮ ነበር ፡፡በፍትህ ጋዜጣ ላይ በፃፋቸው መጣጥፎች አመፅ ቀስቅሷል ተብሎ የተከሰሰው የጋዜጠኛ ተመስገን ጠበቃ ይግባኝ ለሰበር ችሎት ያቀረበ ቢሆንም በትናንትናው እለት በ1ኛ ሰበር ችሎት ግን አልተገኘም የተመስገን ቤተሰቦች በተገኙበት ትናንት ማምሻውን በፌዴራል ጠቅላይ ፍ/ቤት 1ኛ ሰበር አጣሪ ችሎት የፌዴራል ጠቅላይ ፍ/ቤት ብይን እንዲቀርብለት ትዕ ዛዝ አስተላልፏል፡፡(ታሪክ አዱኛ)

ሐምሌ 21/2007 ዓ.ም

በሂልተን ሆቴል ለመገናኛ ብዙሃን እና ለኮሙኒኬሽን ባለሞያዎች ለውይይት በቀረበው ረቂቅ ፖሊሲ ላይ ለፖሊሲው መዘጋጀት እንደ ምክንያትነት ከተጠቀሱት ጉዳዮች መካከል የህዝብ፣ የግልም ሆነ የማህበረሰብ መገናኛ ብዙሃን የሚመሩበት ራሱን የቻለ የተጠቃለለ ሀገራዊ የፖሊሲ ሰነድ አለመኖር በዋናነት በሰነዱ ላይ ተጠቅሷል፡፡

በመድረኩ ላይ ጥናታዊ ፅሁፍ ያቀረቡት የሚዲያ ፖሊሲና ዝግጅት ትግበራ ከፍተኛ ባለሞያ የሆኑት አቶ መንግስቱ ላማሮ ሲሆኑ፤  በጥናታዊ  ፅሁፋቸውም የግል ጋዜጦች የገበያ ሁኔታ መቀነስ፣ ህጋዊ የንግድ ፍቃድ ያለመኖር፣ በባህላዊ መንገድ የመንቀሳቀስና በግለሰቦች ፍቃድ ላይ የተንጠለጠለ መሆን እንዲሁም ስነ-ምግባርን ጠብቆና የሀገሪቱን ህግ ተከትሎ አለመስራት መሆኑን በጥናታቸው ተጠቅሷል፡፡ ለረቂቅ ፖሊሲ ማዳበሪያ ሃሳቦችም ከተሳታፊዎች ተነስተዋል፡፡ የመንግሥት ሚዲያን ብቻ የሚደግፉ የመንግሥት ተቋማት መኖራቸውም ከተሳታፊዎች ተጠቁሟል፡፡

የመንግሥት ኮሙኒኬሽን ጉዳዮች ፅ/ቤት የሚዲያ ልማትና ብዝሃነት ዳይሬክተር አቶ ታምሩ ደጀኔ በበኩላቸው ፖሊሲውን ማዘጋጀት ያስፈለገበት ምክንያት የመገናኛ ብዙሃን እና የኮሙኒኬሽን መዋቅሩ በሚፈለገው ደረጃ የሀገሪቱን እድገት ተከትሎ እያደገ ባለመሆኑ ነው ብለዋል፡፡ ይህ ረቂቅ ፖሊሲ በቀጣይ ለባለድርሻ አካላት በተመሳሳይ ለውይይት በመቅረብ ከ1 ዓመት በኋላ ተግባራዊ እንደሚሆንም ገልፀዋል፡፡ (ታሪክ አዱኛ)

ሐምሌ 22/2007 ዓ.ም

ባለስልጣኑ ከግብር ከፋዮችና ከባለድርሻ አካላት ጋር ባደረገው ውይይት ላይ ከጊዜ ወደ ጊዜ እያደረገው ያለው መሻሻል የሚበረታታ በመሆኑ አሁንም መስተካከል ያለባቸው በርካታ መሰናክሎች መኖራቸውን ያነሱት የውይይቱ ተሳታፊዎች የበለጠ ውጤታማና ዓለም አቀፍ ተወዳዳሪ ለመሆን ችግሮቹን ማስተካከል ተገቢ ነው ብለዋል፡፡

አብዛኞቹ ችግሮች ግብር ከፋዮችን የሚያጉላሉና ውጣ ውረድ ያለባቸው በመሆናቸው በግብር አሰባሰብ ሂደቱ ላይ አሉታዊ ተፅእኖ የሚፈጥሩ ናቸው ተብሏል፡፡

በተለይ በጉምሩክ ዘርፍ ከውጭ የሚገቡ እቃዎችን ለመረከብ ያለው ሂደት የተጓተተና ከፍተኛ ቁጥር የሚባልበት መሆኑ፤ ተቋማት ኪሳራና ሌሎች ችግሮች ሲያጋጥሟቸው ድጋፍና ምክር አለመኖሩ፣ ደረሰኞች በኔትወርክ መቆራረጥ ምክንያት ማቅረብ አለመቻሉ ለሚነሱ ቅሬታዎች ተገቢና ፈጣን ምላሽ አለመኖሩ ለግብር ከፋዩ በቂ ግንዛቤ አለመፈጠሩና የመሳሰሉት የተቋሙን ችግሮች ናቸው ተብሏል፡፡

ባለስልጣኑ በበኩሉ የተቋሙን አቅም ከደንበኞቹ ፍላጎት ጋር ለማጣጣም የሰው ሃይል የቴክኖሎጂና የአሰራር ማሻሻያዎችን ለማድረግ እንደሚሰሩ አስታውቋል፡፡ (እንገደና ደሳለኝ)

ሐምሌ 22/2007 ዓ.ም

የስምምነቱ ዋና ዓላማ ከዩኒቨርሲቲው አባይ የምርምር ተቋም ጋር በጋራ ለመስራትና “የኢትዮጵያ ሴማዊ ቋንቋዎችና ባሕል ጥናት” በተሰኘ የትምህርት መስክ የድህረ- ምረቃ ፕሮግራም ለመክፈት መሆኑን ጀርመን አገር ከሚገኘው ሒዮብ ሉዶልፍ (HLLES) የኢትዮጵያ ጥናት ማዕከል የመጡት ዶ/ር ጌቴ ገላዬ እና ዶ/ር ዴቪስ ኖርዩትሲን ገልፀዋል፡፡

በስምምነቱ መሰረትም ሁለቱ ተቋማት በጋራ በመተጋገዝ ስለ ኢትዮጵያ ቋንቋዎች ግዕዝን ጨምሮ በጋራ ለመወያየትና የጋራ የሆኑ የጥናት መስኮችን ለማካሄድ የሚቻልበትን መንገድ ለማመቻቸት እንዲሁም የአካባቢውን ማሕበረሰብ የአኗኗር ዘዴ ወደ ዘመናዊ መቀየር የሚቻልበት ሰፊ ጥናት ለማካሄድ አቅደዋል፡፡

የባሕርዳር ዩኒቨርሲቲ የምርምርና ማሕበረሰብ አገልግሎት ም/ፕሬዚዳንት ዶ/ር ተስፋዬ ሽፈራው ለእንግዶች የእንኳን ደህና መጣችሁ መልዕክት ካስተላለፉ በኋላ የሁለቱ ዩኒቨርሲቲዎች በጋራ መስራት ፋይዳው የጐላ እንደሆነና ሁሉም አካላት የበኩላቸውን ድርሻ ወስደው አኩሪ ተግባር ለመስራት መረባረብ እንዳለባቸው አሳስበዋል፡፡  ተሳታፊዎችም በበኩላቸው ሊሰራ የታሰበው ሥራ እጅግ በጣም አስፈላጊና ጠቃሚ ስለሆነ ሀሳቡን ይዘው ለመጡት እንግዶች ምስጋና አቅርበው የሁለቱ ዩኒቨርሲቲዎች የጋራ ስራ ዘላቂ እንዲሆንና እንዲጠናከር፤ አስፈላጊ ነገሮችን ሁሉ እንዲያሟሉ ብሎም የታሰበው የድህረ-ምረቃ ትምህርት ወደ ዶክትሬት ደረጃ እንዲያድግ ርብርብ ማድረግ እንደሚገባ አሳስበዋል፡፡

ዶ/ር ተስፋዬ አክለውም ሁለቱም ዩኒቨርሲቲዎች በቂ መምህራን ከመመደብ ጀምሮ ሊያጋጥሙ የሚችሉ ችግሮችን በመመካከርና የጋራ ግንዛቤ በመፍጠር መፍታት እንዲቻልና ከታቀዱት ሁለት ግቦች ባሻገር ሌሎች ተግባራትን መስራት እንደሚያስፈልግ ገልፀዋል፡፡

-    ምንጭ የባህርዳር ዩኒቨርስቲ