Super User

Super User

Email: This email address is being protected from spambots. You need JavaScript enabled to view it.

ሰኔ 11/2008 ዓ.ም

የደቡብ ኮሪያ መንግስት በትናንትናው ዕለት 500,000 የአሜሪካን ዶላር የሰብዓዊ ዕርዳታ ማድረጉ ተገልጧል፡፡ ይኸው ድጋፍ በድርቅ ለተጎዱ ወገኖች የሚውል ሲሆን የደቡብ ኮሪያ አምባሳደር ቲም ሙን ሀን እንዲሁም ከብሔራዊ የአደጋ ስጋት ስራ አመራር የቅድሚያ ማስጠንቀቂያ ዳይሬክቶሬት ዳይሬክተር አቶ ሙሉነህ ወልደማሪያም በተገኙበት  በብሔራዊ የአደጋ ስጋት ስራ አመራር ኮሚሽን ጽ/ቤት ርክክቡ ተደርጓል፡፡

በአገራችን 2007/2008 ዓ.ም በኤልኒኖ ክስተት የመኸርና የበልግ ዝናብ እጥረት በማጋጠሙ በተከሰተው ድርቅ 10.2 ሚሊዮን ህዝብ ለጉዳት መጋለጡን መሰረት በማድረግ በጃንዋሪ 2016 የወጣውን የሰብዓዊ ሰነድ መነሻ በማድረግ በድርቁ ለተጎዱ ወገኖች ድጋፍ እንዲውል የተሰጠ የመጀመሪያ ድጋፍ መሆኑ የተገለፀ ሲሆን ኢትዮጵያና ደቡብ ኮርያ ካላቸው የቆየ ወዳጅነትና ትብብርም በተጨማሪ በቀጣይ አገሪቱ በምታደርጋቸው የልማት እንቅስቃሴዎችም የደቡብ ኮርያ መንግስት የቅርብ ድጋፍ እንደማይለይ አምባሳደር ቲም ሙን ሀን ገልፀዋል፡፡

ይኸው ድጋፍ በአሁኑ ወቅት በአገራችን ድርቁ በተከሰተባቸው የተለያዩ አካባቢዎች እየተደረገ ባለው ድጋፍ ተጨማሪ በመሆን ጥቅም ላይ እንደሚውል አቶ ሙሉነህ ወ/ማሪያም ገልፀዋል፡፡

ምንጭ- ብሔራዊ የአደጋ ስጋት ስራ አመራር ኮሚሽን

ሰኔ 09/2008 ዓ.ም

የብሄራዊ ደም ባንክ አገልግሎት ዋና ዳይሬክተር ዶ/ር ሀብተማሪያም ደመወዝ እንደገለጹት ባለፉት ዘጠኝ ወራት ብቻ ከመደበኛ እና ከበጎ ፍቃደኛ ደም ለጋሾች ከ128 ሺህ ዩኒት በላይ ደም መሰብሰቡን ገልፀዋል፡፡ ዋና ዳይሬክተሩ አክለውም የዓለም ደም ለጋሾች ቀን ዘመቻ በዋናነት የበጎ ፈቃድ ደም ለጋሾች በለገሱት ደም ህይወታቸው የተረፉ ሰዎችን ታሪክ ማንፀባረቅና የመደበኛ በጎ ፍቃድ ደም ለጋሾች ህይወት አድን ስራን ቀጣይ እንዲያደርጉት ማነቃቃት፣ እንዲሁም ህብረተሰቡ በተለይ ወጣቱ ጤንነቱ ተጠብቆ በበጎ ፍቃድ ደም እንዲለግስ ማነቃቃት ነው ብለዋል፡፡

አስተማማኝ የደም አቅርቦት የህመምተኞችን ህይወት በማራዘም የተሻለ ህይወት እንዲመሩ ከማስቻሉም በላይ ውስብስብ የሆኑ የህክምና ስራዎችን፣ የእናቶችና የህፃናት ህይወት የማዳን ተግባርን በከፍተኛ ደረጃ ማቃለል ችሏል፡፡ በአለም ላይም በብዙ አገሮች በቂና ደህንነቱ የተጠበቀ ደም የማቅረብ ተግዳሮቶች እንዳሉባቸው የሚታወቅ ሲሆን በዋናነት በቂና አስተማማኝ የደም አቅርቦት ሊገኝ የሚችለው ያለማቋረጥ ከመደበኛ የበጎ ፍቃደኛ ደም ለጋሾች በሚገኝ የደም ልገሳ ነው፡፡ ከትናንት በስቲያ መከበር የጀመረው የበዓል ስነ-ሥርዓቱም እስከ አመቱ መጨረሻ ድረስ የሚቀጥል ሲሆን በዚህ ጊዜ ውስጥ ለ20 ሚሊዮን ህዝብ የፅሑፍ መልእክት የሚላክ፣ ከሚመለከታቸው አመራሮች ጋር የእግር ጉዞ የሚደረግ፣ ደም ለጋሾችን የማመስገንና እውቅና የመስጠት፣ ስለ ደም ባንክ አገልግሎት የግንዛቤ ማስጨበጫ ስራዎችን የመስራትና ከአዲስ አበባ ወጣት ፎረሞች ጋር በመሆን ደም የማስለገስ ተግባራት እንደሚከናወኑ ለማወቅ ተችሏል፡፡

የዘንድሮ የደም ለጋሾች ቀን በአለም አቀፍ ደረጃ ለ13ኛ ጊዜ በሀገራችን ደግሞ ለ12ኛ ጊዜ መከበር የጀመረ ሲሆን በአሉም “ደም ያስተሳስረናል” በሚል መሪ ቃል እስከ አመቱ መጨረሻ ድረስ ይቀጥላል፡፡

ምንጭ - የኢፌዴሪ የጤና ጥበቃ ሚኒስቴር

ግንቦት 29/2008 ዓ.ም

ከቀኑ 9፡30 ሰዓት በአዲስ አበባ የጣለው በረዶ የቀላቀለ ከባድ ዝናብ ጥቁር አንበሳ ሆስፒታል አካባቢን፣ ሜትሮሎጂ እና ተክለሀይማኖት አካባቢዎችን በጎርፍ ያጥለቀለቀ ሲሆን በሰው ላይ ምንም ጉዳት አላደረሰም ተብሏል፡፡ ጎርፏ ስድስት መኖሪያ ቤቶች ውስጥ የገባ ሲሆን ሶስት መቶ አስር ሺ ብር የሚገመት የንብረት ውድመትንም አስከትሏል፡፡

የእሳትና ድንገተኛ አደጋዎች መከላከያና መቆጣጠሪያ ሰራተኞች በየመኖሪያ ቤቶቹ የገባውን ውሀ ለማውጣት ስድስት ሰዓታትን የፈጀ እርዳታንም ሲሰጡ እንደነበር በአዲስ አበባ ከተማ አስተዳደር እሳትና ድንገተኛ አደጋዎች መከላከልና መቆጣጠር ባለስልጣን የህዝብ ግንኙነት ባለሙያው አቶ ንጋቱ ማሞ ለዛሚ 90.7 ኤፍ ኤም ተናግረዋል፡፡ (ያልፋል አሻግር)

ግንቦት 29/2008 ዓ.ም

እሁድ ምሽት 2፡30 ሰዓት በኮተቤ ዩኒቨርሲቲ ኮሌጅ የተማሪዎች የመኝታ ፍራሽ ማከማቻ በሆነ ክፍል ውስጥ የተነሳው እሳት አራት ተማሪዎች በጭስ እንዲታፈኑ ያደረገ ሲሆን አንድ መቶ ሺ ብር የሚገመት የንብረት ውድመትም አስከትሏል ሲሉ በአዲስ አበባ ከተማ አስተዳደር እሳትና ድንገተኛ አደጋዎች መከላከልና መቆጣጠር ባለስልጣን የህዝብ ግንኙነት ባለሙያው አቶ ንጋቱ ማሞ ለዛሚ ተናግረዋል፡፡

አደጋ የደረሰባቸው ሁለት ተማሪዎች በሚኒሊክ ሆስፒታል ሁለቱ ደግሞ በየካ ጤና ጣቢያ የህክምና እርዳታን እያገኙ እንደሆነ የተናገሩት ሀላፊው የእሳቱ ትክክለኛ መንስኤም በፖሊስ እየተጣራ እንደሆነ አክለው ተናግረዋል፡፡

እሳቱን ለማጥፋት 12 ሺ ሊትር ውሀ፣ 14 ባለሙያዎች እና 2 አምቡላንስ እንዲሁም ሁለት የአደጋ መከላከያ መኪናዎች ተሰማርተው እንደነበርም ተገልጧል፡፡ (ያልፋል አሻግር)

ግንቦት 23/2008 ዓ.ም

የኮድ ቁጥሩ 12 የሆነውና ለ12ኛ ክፍል ሀገር አቀፍ ፈተና ወሳጆች ቀርቦ የነበረው የእንግሊዘኛ ፈተና ተሰርቆ መውጣቱ በመታወቁ ፈተናው እንዲሰረዝ መደረጉና ሌሎች ፈተናዎችም ላለመሰረቃቸው ማረጋገጫ ባለመኖሩ አጠቃላይ የፈተና ሂደቱ እንዲቋረጥ መደረጉ ይታወሳል፡፡

ዛሚ ከትምህርት ሚኒስቴር የህዝብ ግንኙነት ባለሙያው አቶ ምስጋና ፀጋዬ እንደሰማው እንዲህ አይነት ችግር ሲያጋጥም እንደ አማራጭ የሚቀርቡና ለመጠባበቂያ ተብለው ተዘጋጅተው የነበሩ ፈተናዎች በመኖራቸው ፈተናው ከአንድ ወር በኋላ ማለትም ከሰኔ 27 እስከ ሰኔ 30 ቀን 2008 ዓመተ ምህረት ድረስ በሁሉም የፈተና ጣቢያዎች ዳግም ይሰጣል ብለዋል፡፡ አቶ ምስጋና ፀጋዬ አክለውም የፈተና ዝግጅቱና አሰጣጡ በከፍተኛ ጥንቃቄና ጥበቃ የሚከናወን ይሆናል ያሉ ሲሆን የህትመትና የስርጭት ስራውም በተመሳሳይ ከፍተኛ ጥበቃ ይደረግበታል ብለዋል፤ ተፈታኞችም ተገቢውን ዝግጅት አድርገው ከአንድ ወር በኋላ ዳግም ለፈተና ለመቀመጥ ይዘጋጁ ሲሉ ለዛሚ 90.7 ኤፍ.ኤም ተናግረዋል፡፡ (ያልፋል አሻግር)

ግንቦት 23/2008 ዓ.ም

ለመላው ህዝብ እና ተፈታኞች ይቅርታ የጠየቁት የ12ኛ ክል ፈተና ተሰርቆ መውጣቱን ተከትሎ ነው፡፡ ትናንት ሌሊት 8፡00 ሰዓት ላይ በማህበራዊ ድረ-ገፅ የተለቀቀው ፈተና ለተማሪዎች ከሚታደለውና በፊታቸው ከሚከፈተው ጋር ተመሳሳይ ሲሆን በዚህም ተሰርቆ መውጣቱ መረጋገጡን የትምህርት ሚኒስቴር የኮሙኒኬሽን ሃላፊ አቶ ምስጋናው ፀጋዬ ለዛሚ 90.7 ኤፍ ኤም ተናግረዋል፡፡

እስካሁን ተሰርቆ መውጣቱ የተረጋገጠው ኮድ 12፤ የእንግሊዝኛ ፈተና ሲሆን ለ4 ተከታታይ ቀናት የሚሰጠው ብሔራዊ ፈተና ተቋርጧል፤ ላልተወሰነ ጊዜም ተራዝሟል መባሉ ተሰምቷል፡፡ (ሱራፌል ዘላለም)

ግንቦት 17/2008 ዓ.ም

ዶክተር ቴዎድሮስ በጀኔቫ እየተካሄደ ባለው የአለም ጤና ጉባኤ ላይ የምርጫ ቅስቀሳቸውን በይፋ ጀምረዋል፡፡ ድርጅቱን በዋና ዳይሬክተርነት ለመምራት ከአፍሪካ ብቸኛው እጩ በመሆን እየተወዳሩ ያሉት የኢፌዴሪ ውጭ ጉዳይ ሚንስትሩ ዶ/ር ቴዎድሮስ አድሃኖም እስካሁን በግላቸውም ሆነ እንደተቋም ያስመዘገቧቸው ውጤቶች ለማሸነፍ የሚያስችሉ ናቸው ተብለዋል፡፡ ዶ/ር ቴዎድሮስ አድሃኖም ከ1998 እስከ 2004 ዓ.ም የኢፌዴሪ ጤና ጥበቃ ሚኒስትር በነበሩበት ጊዜ በመሪነት ያሳኳቸው ስኬቶች አለም አቀፍ እውቅና ያላቸው ከመሆናቸውም በላይ ካሁን በፊትም የተለያዩ አለም አቀፍ ተቋማትንም በቦርድ ሰብሳቢነት የመምራት ልምድ አላቸው ሲሉ የውጭ ጉዳይ ሚንስቴር ቃል አቀባይ አቶ ተወልደ ሙልጌታ ተናግረዋል፡፡ እስካሁን አፍሪካ የአለም የጤና ድርጅት አመራርነትን አግኝታ አታውቅም ያሉት ቃል አቀባዩ ይህንኑ ለማሳካት የመላ አፍሪካ አገራት ድጋፋቸውን ለዶ/ር ቴዎድሮስ በመስጠት ላይ ናቸው ብለዋል፡፡ በአሁኑ ሰዓት ዶክተር ቴዎድሮስ በጀኔቫ እየተካሄደ ባለው የአለም ጤና ጉባኤ ላይ የአለም ጤና ድርጅት ዋና ዳይሬክተር ሆነው ለመመረጥ የምርጫ ቅስቀሳቸውን በይፋ ጀምረዋል፡፡ ዶክተር ቴዎድሮስ በጄኔቫ ባደረጉት የምርጫ ቅስቀሳ በዓለም ዙሪያ በጤናው ዘርፍ በትብብር መስራት የሚያስችሉ በርካታ መልካም አጋጣሚዎች መኖራቸውን ተናግረዋል። ለሁሉም ዜጋ መሰረታዊ የጤና ጥበቃ አገልግሎቶችን ማረጋገጥ፣ የአስቸኳይ ጊዜ ህክምና ዝግጁነትን ማሳደግ እና የሴቶችን ኑሮ እና ጤና የሚያሳድጉ ፖሊሲዎችን ማጎልበት የአለም ጤና ድርጅት ዋና ዳይሬክተር ሆነው ቢመረጡ የሚያከናውኗቸው ዋና ዋና ተግባራት መሆናቸውንም ነው ሚኒስትሩ ያነሱት። በ26ኛው የአፍሪካ ህብረት የመሪዎች ጉባኤ ላይ ኢትዮጵያ ዶክተር ቴድሮስ አድሃኖምን ለዓለም የጤና ድርጅት ዋና ዳይሬክተርነት ዕጩ ተወዳዳሪ አድርጋ አቅርባ ተቀባይነት ካገኝች በኋላ በቅርቡም ከ30 በላይ የአፍሪካ ሀገራት የጤና ሚኒስትሮች ዶክተር ቴድሮስ ለአለም ጤና ድርጅት ዋና ዳይሬክተርነት ምርጫ እጩ ሆነው መቅረባቸውን መደገፋቸው ይታወቃል። አሁን የአለም የጤና ድርጅትን በዋና ዳይሬክተርነት እየመሩ ያሉትን ቻይናዊቷን ዶክተር ማርጋሬት ቻንን ለመተካት ምርጫው በሚያዝያ 2009 ዓ.ም በስዊዘርላንድ ጄኔቫ ይካሄዳል፡፡ (እንደገና ደሳለኝ)

ግንቦት 17/2008 ዓ.ም

ከመጋቢት ወር 2007 ዓ.ም ጀምሮ ሲሰራ የቆየው የማስተማርና የግንዛቤ ማስጨበጥ ስራ እስከ ግንቦት ወር መጨረሻ ድረስ የሚዘልቅ ሲሆን ግንቦት 30 ህጉ ተግባራዊ ይደረጋል ተብሏል፡፡
የአዲስ አበባ የምግብ፣የመድሀኒትና የጤና ክብካቤ አስተዳደር ቁጥጥር ባለስልጣን ዋና ዳይሬክተር አቶ ጌታቸው ወረቲ እንደተናገሩት ሲጋራን ህዝብ በተሰበሰበበት ቦታ ማጨስን የሚከለክለው መመሪያ የመውጣቱ አስፈላጊነት አጫስ ያልሆኑ ሰዎች በሚያጨሱ ሰዎች አማካኝነት ከሚደርስባቸው የሲጋራ ጭስ ጉዳት መጠበቅ አንዱ ሲሆን የሲጋራ ሱሰኞችን ከጉዳቱ መታደግ የሚለው ሌላኛው አላማው ነው ብለዋል አዳዲስ የሲጋራ አጫሾች እንዳይፈጠሩ ማድረግንም እንዳካተተ ተናግረዋል፡፡

ህዝብ በሚሰበሰብበት ይሁን በሚገለገልበት ማንኛውም ቦታ ትንባሆ ማጨስ፣ ማጨስ በህግ በተከለከለባቸው ቦታዎች የሚገልፅ ምልክት ወይም ፅሁፍ በመግቢያና በመውጫ ቦታዎች እና ሌሎች አስፈላጊ ቦታዎች ላይ አለመለጠፍ፣ በተከለከሉ ቦታዎች ወይም መጨስ በሌለባቸው ቦታዎች ተረፈ ምርት ትንባሆ ማጠራቀሚያ ማስቀመጥ ከብር 2,000 የማያንስ እና ከብር 3,000 የማይበልጥ ገንዘብን ያስቀጣል፡፡ (ያልፋል አሻግር)

ግንቦት 15/2008 ዓ.ም

በተያዘው የመጀመሪያው እድገትና ትራንስፎርሜሽን እቅድ ዘመን ውስጥ የተለያዩ ስራዎችን እንስራ ብለው ከቡራዩ አስተዳደር የኢንቨስትመንት መሬት የተቀበሉና ለረጅም ዓመታት አንዳችም ስራ ያልሰሩ ባለሀብቶች መሬት ከዚህ በኋላ ይነጠቃል ሲሉ የቡራዩ ከንቲባ ዳባ ጅንፌሳ ተናግረዋል፡፡ 

በኢንዱስትሪና በኮሜርሺያል በሚል የተለዩትን መሬቶች የወሰዱት ባለሀብቶች ቁጥርና የወሰዱት የመሬት ልኬታም የተለየ ሲሆን ከ3-5 ለሚደርሱ ዓመታት ልማት ያልታየባቸው 17 ሄክታር መሬቶችም እስካሁን ተለይተዋል፤ ለ10 ዓመታት ያህል ለመጋዘን አገልግሎት ብቻ ያዋሉ 12 ባለሀብቶችም ታውቀዋል፡፡

ከንቲባው እንዳሉት እስካሁን ድረስ በሶስት ደረጃዎች ባለሀብቶቹ ተለይተው ተገቢው እርምጃ እየተወሰደባቸው ሲሆን ለፋብሪካ ግንባታ በሚል መሬት ወስደው መጋዘን ያደረጉ 12 ባለሀብቶች የመጀመሪያ የፅሁፍ ማስጠንቀቂያ ተሰጥቷቸዋል፤ ሌሎች ልዩ ልዩ ችግር ገጥሞናል በሚል ሰበብ መሬቱን በከፍተኛ ገንዘብ ለመሸጥ የተዘጋጁና የተደረሰባቸው 18 ባለሀብቶችም የታወቁ ሲሆን አጠቃላይ የያዙት የመሬት ስፋትም 20 ሄክታር መሆኑ ታውቋል፡፡ እስካሁን የተጣራው መረጃ ለካቢኔ ቀርቧል ያሉት ከንቲባው በተያዘው ሳምንት የማሰናበቻ ደብዳቤ ይደርሳቸዋልም ሲሉ ተናግረዋል፡፡ (ያልፋል አሻግር)

ግንቦት 15/2008 ዓ.ም

ድርጅቱ በኢትዮጵያ ቢሮውን መክፈቱን አስመልክቶ ዛሬ ባካሄደው ጉባኤ ላይ የዓለም የሜትሪዎሎጂ ድርጅት (WMO) ዋና ፀሐፊ ፕሮፌሰር ፒተሪ ታላስ ተገኝተዋል፡፡ ፕሮፌሰሩ የዓለም የሜትሪዎሎጂ ድርጅት የአፍሪካ ቢሮውን ወደ አዲስ አበባ ሲያዛውር ስራውን በቅርበት እና በተሻለ መልኩ ለማከናወን እንዲረዳው በማሰብ ነው ብለዋል፡፡  

የኢፌዴሪ ውሃ መስኖ እና ኤሌክትሪክ ሚኒስትሩ አቶ ሞቱማ መቃሳ በበኩላቸው የዓለም የሜትሪዎሎጂ ድርጅት ቢሮውን ከስዊዘርላንድ ጄኔቫ ወደ አዲስ አበባ በማዘዋወሩ የተሰማቸውን ደስታ ገልፀው፤ የኢትዮጵያ መንግስት ለቢሮው እንቅስቃሴ ድጋፍ ያደርጋል ብለዋል፡፡

ድርጅቱ ዛሬ ጥቁር አንበሳ አካባቢ በሚገኘው የብሔራዊ ሜትሪዎሎጂ ኤጀንሲ ግቢ የአፍሪካ ቢሮውን በይፋ ከፍቷል፡፡ (እንደገና ደሳለኝ)