በሀገሪቱ ቀዳሚ የሆነው የእንስሳት ሆስፒታል ተኝተው ለሚታከሙና ተመላላሽ እንስሳት አገልግሎት እየሰጠ ነው፡፡

ሰኔ 24/2008 ዓ.ም

በመቀሌ ዩኒቨርስቲ የሚገኘው የእንስሳት ጤና ሳይንስ ኮሌጅ በሀገሪቱ የመጀመሪያውን የእንስሳት ሆስፒታል ገንብቶ ለአገልግሎት አብቅቷል፡፡ ሆስፒታሉ ላብራቶሪዎችን ጨምሮ በቁሳቁስና በባለሙያ የተደራጀ ሲሆን ዘመናዊ የህክምና መሳሪያዎችም ተገጥመውለታል፡፡

በማዕከሉ ከቀላል ጀምሮ እስከ ቀዶ ጥገና የሚደርስ ህክምና እንዲሁም ከድንገተኛ ጀምሮ እስከ 4 ቀን ድረስ ተኝተው ለሚታከሙ እንስሳት የህክምና አገልግሎት ይሰጣል፡፡

በዚህ ሂደት ውስጥ ለሰው ልጆች በህክምና ተቋማት እንደሚያገኙት አገልግሎት ካርድ ማውጣት የሚጠበቅባቸው ሲሆን ይህም ባመጧቸው ሰዎች አማካኝነት ከስማቸው ጀምሮ ሌሎች መረጃዎች ይመዘገባሉ፡፡

በመቀሌ አካባቢ የሚገኙ አርሶ አደሮችም በከብቶቻቸውም ሆነ በቤት እንስሳቶቻቸው የሚደርሱ የጤና ቸግሮችን ተከትሎ ወደ ሆስፒታሉ በማምጣት ህክምና እንዲያገኙ ያደርጋሉ፡፡

በየቀኑ 5 የሚደርሱ ስፖሻሊስት ሀኪሞች ለእንስሳቱ ክትትል እንደሚያደርጉ እና ከመድሃኒት ጀምሮ አስፈላጊ ቁሳቁሶች በሆስፒታሉ በመገኘታቸውም ደረጃውን የጠበቀ አገልግሎት እንዲሰጥ ማድረግ መቻሉን ዶ/ር በሪሁን የጤና ሳይንስ ኮሌጁ ዲን ተናግረዋል፡፡

በሆስፒታሉ የተለያዩ የምርምር ስራዎች የሚከናወኑ ሲሆን ይህም አዳዲስ ግኝቶችና ሰፋፊ ተግባራትን ለማከናወን አስችሏልም ተብሏል፡፡ (ሱራፌል ዘላለም)

Leave a comment

Make sure you enter the (*) required information where indicated. HTML code is not allowed.