ከበጎ ፍቃደኛ ደም ለጋሾች ከ128 ሺህ ዩኒት በላይ ደም ተሰበሰበ፡፡

ሰኔ 09/2008 ዓ.ም

የብሄራዊ ደም ባንክ አገልግሎት ዋና ዳይሬክተር ዶ/ር ሀብተማሪያም ደመወዝ እንደገለጹት ባለፉት ዘጠኝ ወራት ብቻ ከመደበኛ እና ከበጎ ፍቃደኛ ደም ለጋሾች ከ128 ሺህ ዩኒት በላይ ደም መሰብሰቡን ገልፀዋል፡፡ ዋና ዳይሬክተሩ አክለውም የዓለም ደም ለጋሾች ቀን ዘመቻ በዋናነት የበጎ ፈቃድ ደም ለጋሾች በለገሱት ደም ህይወታቸው የተረፉ ሰዎችን ታሪክ ማንፀባረቅና የመደበኛ በጎ ፍቃድ ደም ለጋሾች ህይወት አድን ስራን ቀጣይ እንዲያደርጉት ማነቃቃት፣ እንዲሁም ህብረተሰቡ በተለይ ወጣቱ ጤንነቱ ተጠብቆ በበጎ ፍቃድ ደም እንዲለግስ ማነቃቃት ነው ብለዋል፡፡

አስተማማኝ የደም አቅርቦት የህመምተኞችን ህይወት በማራዘም የተሻለ ህይወት እንዲመሩ ከማስቻሉም በላይ ውስብስብ የሆኑ የህክምና ስራዎችን፣ የእናቶችና የህፃናት ህይወት የማዳን ተግባርን በከፍተኛ ደረጃ ማቃለል ችሏል፡፡ በአለም ላይም በብዙ አገሮች በቂና ደህንነቱ የተጠበቀ ደም የማቅረብ ተግዳሮቶች እንዳሉባቸው የሚታወቅ ሲሆን በዋናነት በቂና አስተማማኝ የደም አቅርቦት ሊገኝ የሚችለው ያለማቋረጥ ከመደበኛ የበጎ ፍቃደኛ ደም ለጋሾች በሚገኝ የደም ልገሳ ነው፡፡ ከትናንት በስቲያ መከበር የጀመረው የበዓል ስነ-ሥርዓቱም እስከ አመቱ መጨረሻ ድረስ የሚቀጥል ሲሆን በዚህ ጊዜ ውስጥ ለ20 ሚሊዮን ህዝብ የፅሑፍ መልእክት የሚላክ፣ ከሚመለከታቸው አመራሮች ጋር የእግር ጉዞ የሚደረግ፣ ደም ለጋሾችን የማመስገንና እውቅና የመስጠት፣ ስለ ደም ባንክ አገልግሎት የግንዛቤ ማስጨበጫ ስራዎችን የመስራትና ከአዲስ አበባ ወጣት ፎረሞች ጋር በመሆን ደም የማስለገስ ተግባራት እንደሚከናወኑ ለማወቅ ተችሏል፡፡

የዘንድሮ የደም ለጋሾች ቀን በአለም አቀፍ ደረጃ ለ13ኛ ጊዜ በሀገራችን ደግሞ ለ12ኛ ጊዜ መከበር የጀመረ ሲሆን በአሉም “ደም ያስተሳስረናል” በሚል መሪ ቃል እስከ አመቱ መጨረሻ ድረስ ይቀጥላል፡፡

ምንጭ - የኢፌዴሪ የጤና ጥበቃ ሚኒስቴር

Leave a comment

Make sure you enter the (*) required information where indicated. HTML code is not allowed.