አገር አቀፍ ዜናዎች

በአዲስ አበባ ቦሌ ቡልቡላ በግንባታ ላይ ያሉት ከአራት ሺህ 700 በላይ የጋራ የመኖሪያ ህንጻወች በቀጣይ አመት ይመረቃሉ፡፡
በአዲስ አበባ ቁጠባ ቤቶች ልማት ኢንተርፕራይዝ ልዩ ስሙ ቦሌ ቡልቡላ ተብሎ በሚጠራ ቦታ እየተገነቡ የሚገኙት 52 ህንጻዎችንና 4ሺህ 708 የመኖሪያ ቤቶችን ግንባታ አሁን 80 በመቶ የተጠናቀቀ ሲሆን በ2010 አ.ም ይመረቃሉ ሲል ኢንተርፕራይዙ አስታውቋል፡፡
የህንጻዎቹ ግንባታ የተጀመረው በ2006 እና በ2007 አ.ም ነበር፡፡
የግንባታውን ሂደት እያማከረ የሚገኘው የአስፓየር ኤ ኢኮም ድርጅት ፕጀክት አስተባባሪ አቶ ዳንኤል መስፍን በአዲስ አበባ ቁጠባ ቤቶች ልማት ኢንተርፕራይዝ በቅርንጫፍ አንድ ፕሮጀክት ጽህፈት ቤት ስር በቦሌ ቡልቡላ እየተካሄዱ ባሉ ግንባታዎች ደረጃ አንድ የሆኑ 24 ኮንትራክተሮች እንደሚገኙ ገልጸዋል፡፡
በቦሌ ቡልቡላ የቤቶቹ ግንባታ ሲጠናቀቅ በውስጡ 4ሺህ 708 አባወራ የመያዝ አቅም ያላቸው የመኖሪያ ቤቶች፤ 1ሺህ 170 የንግድ ቤቶች፤ ከሶስት ሺህ በላይ መኪና ማስቆም የሚያስችል ማቆሚያ፤ የጋራ የመጠቀሚያ ቦታዎች፤ የህጻናት መዋያና የህክምና መስጫ ጣቢያ እንደሚኖረው የኢንተርፕራይዙ የኮሚውኒኬሽን ደጋፊ የስራ ሂደት አስታውቋል፡፡
ናርዶስ ዩሴፍ

ከ5 ሚሊየን ብር በላይ የተገመቱ የኮንትሮባንድ ዕቃዎች ተያዙ
በኢትዮጵያ ገቢዎችና ጉምሩክ ባለስልጣን የአዳማና የኮምቦልቻ ቅ/ጽ/ቤቶች ግምታዊ ዋጋቸው ከ5 ሚሊየንብር በላይ የሆኑ የኮንትሮባንድ ዕቃዎች መያዛቸውን አስታወቁ፡፡
ከአዳማቅ/ፅ/ቤት የተገኘው መረጃ እንደሚመለክተው 2.3 ሚሊየን ብር የተገመቱ ህገወጥ ዕቃዎቹ ወደ አዳማ ከተማ ሊገቡ ሲሉ በአዳማ ከተማ በተካሄደ ኮንትሮባንድ የመከላከል ዘመቻ እንደተያዙ ለማወቅ ተችሏል፡፡
ከተያዙት የኮንትሮባንድ ዕቃዎችሺሻ፣ ልባሽ ጨርቆች፣ መድሃኒቶች፣ ሽቶ እና አዳዲስ አልባሳት ይገኙበታል፡፡
በተመሳሳይ የኮምቦልቻ ቅ/ጽ/ቤትከ900ሺ ብር በላይ ዕገ ወጥ ኤሌክትሮኒክስ፣ አዳዲስ አልባሳት፣ ከስሞቲክስ እና ጫማ በሚኒባስ እና በህዝብ ማመላለሻ መኪኖች በህገ-ወጥ መንገድ ሲጓጓዙ ተይዘዋል፡፡
እቃዎቹ የተያዙት በወልዲያ የመቆጣጠሪያ ጣቢያ በሐምሌ 2009 ዓ.ም. መሆኑን የቅ/ጽ/ቤቱ የደንበኞች ትምህርትና ድጋፍ ቡድን አስተባባሪ አቶ መሀመድ አህመድ ተናገረዋል፡፡
ከአፍዴራ ተነስቶ በወልድያ በኩል አዲስ አበባ ለመግባት በተሳቢ መኪና ተጭኖ ሲጓዝ የነበረው የኮንትሮባንድ እቃ ግምታዊ ዋጋው ከ3.8 ሚሊየን ብር በላይ መሆኑን አስታውቀዋል፡፡
ምትኬ ቶሌራ

የአለም ባንክ ጥናት ኢትዩጲያ በ2009 ካሳየችው 8.3 የእድገት ምጣኔ የተበደረችው ገንዘብ 50 በመቶ እንደሚልቅ ያሳያል፡፡
አለም ባንክ በየአመቱ ፈጣን የኢኮኖሚ እድገት ያሳዩ ሀገራት ዝርዝር በሚያሳይበት የአለም ኢኮኖሚ እድገት የዚህ አመት እትሙ ላይ ኢትዩጲያ ባጠናቀቅነው የበጀት አመት ኢኮኖሚዋ በ8.3 በመቶ እንዳደገ አመላክቷል፡፡ ከአለም ኢኮኖሚ እድገት ጋር ሲነጻጸርም በ2.7 በመቶ ልቆ ተገኝቷል፡፡
አለም አቀፉ ተቋም እድገቱ በተስፋፋ የመሰረተ ልማት ግንባታ ምክንያት እንደመጣ ጠቁሟል፡፡
ነገር ግን ኢትዩጲያ ባለፉት ሶስት አመታት ከ2006አ.ም እስከ 2008 አ.ም ባለው ጊዜ የብድር መጠኗ ከእድገቷ 10 በመቶ ሲልቅ በዚህ አመት ደግሞ 50 በመቶ ሆኗል፡፡
አለም ባንክ አብዛኞቹ ፈጣን እድገት የሚያስመዘግቡ ኢኮኖሚዎች ከፍተኛ የብድር መጠንእንደሚኖራቸውና ኢትዩጲያ በአሁን ወቅት በ8.5 ሚሊዩን ህዝቦቿ ላይ ከተጋረጠው የድርቅ አደጋ አንጻር ችግሩ አሳሳቢ እንደሆነ አስታውቋል፡፡
ሀገሪቱ ያለባት የብድር መጠን የኢኮኖሚውን እድገት እንዲጎትተው እና ሰብአዊ እርዳታ ለማቅረብ የምትሰራው ስራ ላይም የገንዘብ አቅም ችግር በመፍጠር የድርቁን ጉዳት የከፋ ሊያደርገው ይችላል ሲል ሪፖርቱ አስነብቧል፡፡
ኢትዩጲያ በ2008 በፈጸመቻቸው የብድር ስምምነቶች ምክንያት እያንዳንዱ ዜጋ ከ11ሺህ ብር በላይ እዳ እንዳለበት ከዚህ በፊት መዘገባችን ይታወሳል፡፡
ናርዶስ ዩሴፍ

ኢንተር ኮንቲነንታል አዲስ ሆቴል በአስቸኳይ ጊዜ አዋጅ ተቀዛቅዞ የነበረውን የቱሪዝም ዘርፍ እንደገና እንዲያንሰራራ ለማድረግ በምስራቅ አፍሪካ የመጀመሪያ የሆነውን ተንቀሳቃሽ ሬስቶራንት መክፈቴ ጠቀሜታው የጎላ ነው አለ፡፡

የፌደራል ከፍተኛ ፍርድ ቤት ልደታ ሁለተኛ ምድብ ችሎት በነ ኢንጂነር ፍቃደ ሃይሌ መዝገብ የቀረበው የፅሁፍና የቃል ምርመራ ውጤት ተመሳሳይ አለመሆኑን ገለፀ፡፡
የፌደራል ከፍተኛ ፍርድ ቤት ልደታ ሁለተኛ መደበኛ ችሎት በሙስና ወንጀል የተጠረጠሩ ከፍተኛ የመንግስት ባለ ስልጣናት፣ ነጋዴዎችና .የደላሎችን መዝገብ ሲያይ መቆየቱ ይታወሳል፡፡
ፍርድ ቤቱ በትላንት ውሎው በነ ኢንጂነር ፈቃደ ሀይሌ መዝገብ ፖሊስ ነሀሴ ሶስት 2009 ለፍርድ ቤት በበተፃፈ ደብዳቤ ላይ የተጠርጣሪዎችን የተከሳሽነት ቃል ሰምተናል የሚለው ፅፎ ሳለ በነሀሴ 17 2009 በተፃፈ ሌላ ደብዳቤ የተጠርጣሪዎችን የተከሳሽነት ቃል መስማት ይቀረናል የሚለውን ሀረግ መጠቀሙና መርማሪ ፖሊሶች በችሎት ፊት ቀርበው የተጠርጣሪዎችን ቃል ሙሉ በሙሉ አለመስማታቸውን መናገራቸው እርስ በራሱ የሚጣረስ በመሆኑ መርማሪ ቡዱኑ በቀጣይ ችሎት ሲመጣ በቃልና በሰነድ የሚያቀርበውን መረጃ እርግጠኛነት እንዲያረጋግጥ እና ተስተካክሎ ይቅረብ የሚል ጥብቅ ማሳሰሚያ አስተላልፏል፡፡
ፖሊስ በተጠርጣሪዎቹ ላይ የኦዲት ስራዎችን ለመስራት ፣በእንግሊዘኛ ቋንቋ የተፃፉ ሰነዶችን ለማስተርጎም ፣ ከአዲስ አበባ መንገዶች ባለ ስልጣንና በሌሎች የመንግስትና የግል ድርጅቶች ያሉ ሰነዶች መመርመር ይቀሩኛል ፣ ተጠርጣሪዎች መረጃ ሊያሸሹና ሊያበላሹ ስለሚችሉ የዋስትና መብታቸው አይከበር ለኔም ቀሪ ምርመራዎችን መፈፀም እንዲያስችለኝ ተጨማሪ 14 ቀናት ይጨመርልኝ ሲል ፍርድ ቤትን ጠይቋል፡፡
የተጠርጣሪ ጠበቃዎች በበኩላቸው ከአስራ አራት ቀን በፊት በዋለው ችሎት መርማሪ ፖሊሶቹ ተጨማሪ 14 ቀን ጊዜ ይፈቀድልን ባሉት መሰረት ቀኑ ቢፈቀድም እንሰራለን ያሉትን ስራ በትጋት አልሰሩም ፣አሁን ላይ እንሰራለን ያሉት ስራ በባለፈው ችሎት ተጥይቋል በዚህ ምክንያት የተጠርጣሪዎች የዋስትና መብት ይከበር ተጨማሪ የቀን ይጨመር ጉዳይ አግባብ አይደለም ሲሉ ተከራክረዋል፡፡
የግራ ቀኙን ክርክር ያደመጠው ፍርድ ቤትም ምርመራው በትጋት ይሰራ ከሚል ትዕዛዝ ጋር ተጨማሪ 10 ቀን ፈቅዷል፡፡
ፍርድ ቤቱ ከዚህም በተጨማሪ በነ አቶ መስፍን መዝገብ የነ አበበ ተስፋዬ የክስ መዝገብ ላይ የግራ ቀኙን ክርክር አይቶ ለነሀሴ 29 ተለዋጭ ቀጠሮ የሰጠ ሲሆን
የነ አቶ ዘነበ ይማም መዝገብ ነሀሴ 25 እንዲታይ ወስኗል፡፡

ያልተገባ ዉህደት ፈጽማችኋል በሚል የተከሰሱት አምቦ ዉሃ እና ኢስት አፍሪካ ቦትሊንግ ያቀረቡት የክስ መቃወሚያ ዉድቅ ተደረገባቸዉ፡፡
አምቦ የማዕድን ዉሃ አክሲዮን ማህበር እና ኢስት አፍሪካ ቦትሊንግ አክሲዮን ማህበር በኢኮኖሚ ላይ አሉታዊ ተጽዕኖ የሚያሳድር ዉህደት እና የዉህደት ቅንብር ፈጽመዋል በሚል በፌደራል ሸማቾች እና የንግድ ዉድድር ባለስልጣን በቀረበባቸዉ ክስ መሰረት ሰኔ 26 ቀን 2009 አ. ም ላይ በዋለዉ ችሎት የ አንደኛ ተከሳሽ ኢስት አፍሪካ ቦትሊንግ ጠበቃ ባቀረቡት የክስ መቃወሚያ ላይ ችሎቱ ዛሬ ነሃሴ 17 2009 አ.ም ብይን ሰጥቷል፡፡
ጠበቃዉ በመቃወሚያቸዉ ዉህደት ወይም ቅንብር መኖርን የሚመለከት የክስ ምክንያት ስለሌለ ክሱ ዉድቅ እንዲደረግ ለ ችሎቱ ጠይቀዉ የነበረ ሲሆን የባለስልጣን መ/ቤቱ የክስ ባለሞያ በበኩላቸዉ ጉዳዩ የህዝብ እና የመንግስት ነዉ ይህ ህጋዊ ያልሆነ ዉህደት በመፈጸሙም እንደ ሀገር ብዙ የሚታጣ ነገር አለ ሲሉ መቃወሚያዉ ዉድቅ እንዲሆን ጠይቀዉ ነበር ፡፡
በዛሬዉ እለት በዋለዉ ችሎትም ባለስልጣን መ/ቤቱ በአዋጁ በተቀመጠዉ መሰረት የመክሰስ መብት ስላለዉ እና የተጠቀሱት ምክንያቶች አሳማኝ ሆነዉ በመገኘታቸዉ ችሎቱ የ አንደኛ ተከሳሽን መቃወሚያ ውድቅ አድርጓል፡፡
በዚህም በሁለቱም በከሳሽ እና ተከሳሽ በኩል የቀረቡት ማለትም
በህጉ ዉህደት እና የዉህደት ቅንብር በአዋጁ መሰረት አንድ ናቸዉ ወይስ የተለያዩ ናቸዉ በሚል፤
ተከሳሾች ህጉ ከሚያዘዉ ዉጪ የዉህደት ስምምነት ፈጽመዋል ወይስ አልፈጸሙም በሚል እና
ዉህደት ተፈጽሟል ከተባለስ የሚጠየቀዉ ዳኝነት ምንድነዉ በሚሉት 3 ጭብጦች ላይ የቃል ክርክር ለማድረግ ችሎቱ ለ ጳሉሜ 1 ቀን 2009 አ.ም ቀጠሮ ይዟል፡፡
ዘገባዉ የእጹብድንቅ ሀይሉ

ብሄራዊ የደም ባንክ አገልግሎት በተጠናቀቀው የበጀት አመት በአገር አቀፍ ደረጃ 173 ሺህ 923 ዩኒት ደም በመላ ሀገሪቱ በሚገኙ 24 የደም ባንኮች አማካኝነት ሰብስቧል፡፡
በዘንድሮው አመት የተሰበሰበው ደም ከአምናው ተመሳሳይ ወቅት ጋር ሲነጻጸር በ33 ሺህ 862 ዩኒት ደም ብልጫ እንዳለውም የብራዊ ደምባንክ አገልግሎት ዋና ዳይሬክተር ዶክተር ብርሀኑ ስዩም ተናግረዋል፡፡
የሚሰበሰበውን ደም ሙሉ ለሙሉ ከበጎ ፈቃደኛ ደም ለጋሾች የተሰበሰበ ሲሆን ቀሪው 1.3 በመቶ ከቤተሰብ ምትክ የተለገሰ እንደሆነ ዋና ዳይሬክተሩ አብራርተዋል፡፡
ከቤተሰብ ምትክ የደም ልገሳ ሙሉ ለሙሉ ባልተላቀቁት የጂግጂጋ፤ሀረርና ድሬ ዳዋ ደም ባንኮች የቅስቀሳ እና የግንዛቤ ማስጨበጫ ትምህርቶችን ለህብረተሰቡ ሰጥተዋል፡፡
በ2010 አ.ም 241 ሺህ ዩኒት ደም ከበጎ ፈቃደኞች ደም ለጋሾች ለማሰባሰብም ታቅዷል፡፡
ናርዶስ ዩሴፍ

ለ38 አመትአንጎላን የመሩት የ74 አመቱ ፕሬዚዳንት ጆዜ ኤድዋርዶ ዶስ ሳንቶስ ስልጣን በቃኝ ብለዋል ።
በነገው እለት ምርጫ የሚያደርጉት አንጎላውያን አዲሱ መሪያቸውን ለመምረጥ በዝግጅት ላይ ናቸዉ
በምርጫውም የዶስ ሳንቶስ ፓርቲ ተወካይ እና ሌሎች ፓርቲዎች የሚሳተፉ ይሆናል።
የዶስ ሳንቶስ ፓርቲ የሆነው የአንጎላ ነጻ አውጪ ንቅናቄ በፕሬዚዳንቱ የሚደገፉትንና የመከላከያ ሚኒስትሩን ጃኦ ሎሬንዞን ለምርጫ የሚያቀርብ ሲሆን ያሸንፋሉ የሚል ግምትም ተሰጥቶአቸዋል።
በአፍሪካ ትልቋ የነዳጅ ላኪ ሀገር የሆነችው አንጎላ ሙስና በከፍተኛ ደረጃ ከሚታይባቸው ሀገራት ተርታ የምትመደብ ሲሆን
ኢዛቤላ የተባለችው የፕሬዚዳንት ዶስ ሳንቶስ ልጅም በሳቸው የአመራር ጊዜ ከአፍሪካ ሀብታም ሴቶች አንዷ መሆን ችላለች።
ተቃዋሚ ፓርቲዎች የአንጎላ ዜጎችን ለዘመናት በችግር ያለምግብ፣ ስራና ኤሌክትሪክ ኖራችኋል አሁን ይህ እንዲያበቃ እኛን ምረጡ እያሉ ይገኛሉ።
የአንጎላው ነጻ አውጪ ንቅናቄ የፖለቲካ ፓርቲ እ.ኤ.አ በ1975 አንጎላ ከፖርቹጋል ነፃ ከወጣች ጀምሮ ሀገሪቷን እየመራ ይገኛል።

በተሻሻለው የታክስ አስተዳደር አዋጅ ነጋዴው የግብር ይግባኝ ለማቅረብ በሚያስዘው የ50 በመቶ መያዣ ላይ ከዚህ ቀደም ይደመር የነበረው ወለድ እና መቀጮ ቀሪ ተደርጎ 50 በመቶ ክፍያው በፍሬ ግብሩ ብቻ እንዲወሰን ተደረገ
ለአብነትም የብቃት ማረጋገጫ ችግሮችን በዝርዝር በመፈተሽ እንደገና እንዲታዩ ከተደረጉት ውስጥ የንግድ ፈቃድና ምዝገባ አዋጁ ተሻሽሎ ለችግሮች ምላሽ እንዲሰጥ በሚያስችል መልኩ ትግበራው ተጀምሯል፡፡ በተሻሻለው የታክስ አስተዳደር አዋጅ ነጋዴው የግብር ይግባኝ ለማቅረብ በሚያስዘው የ50 በመቶ መያዣ ላይ ከዚህ ቀደም ይደመር የነበረው ወለድ እና መቀጮ ቀሪ ተደርጎ 50በመቶ ክፍያው በፍሬ ግብሩ ብቻ እንዲወሰን መደረጉ ፣ የኢንቨስትመንት ምቹነት በየወቅቱ የመገምገም ስራን የኢንቨስትመንት ኮሚሽን እንዲሰራ አቅጣጫ ተቀምጧል፡፡
ከሁለተኛው ሃገር ዓቀፍ የቢዝነስ ኮንፍረንስ በኋላ የተደረጉ ምክክሮች የአምራች ዘርፍ ምርታማነት እና ተወዳዳሪነት ችግሮች ላይ፣ የብረታ ብረት እና ኢነጂነሪንግ፣ የጨርቃ ጨርቅ፣ የኮንስትራክሽን እና የአይቲ ዘርፎች በመንግሰት ግዢ አሰራር የሚገጥማቸው ችግሮች ፣ የጾታ ተሳትፎና ተጽዕኖ በኢኮኖሚያችን ውስጥ የማረጋገጥ ፣ በግንባታ ፈቃድ አሰጣጥ ስርዓት እና የንግድ ደን እና የእንጨት ማቀነባበሪያ ኢንደስትሪዎች ልማት ዙሪያ የሚስተዋሉ ችግሮች ላይ ያተኮሩ ነበሩ፡፡
ከእነዚያ ውስጥ የአምራች ዘርፉ የሚገጥመውን የውጭ ምንዛሪ አቅርቦት ችግር ለመቅረፍ በብሄራዊ ባንክ የተወሰደው የኤል ሲ ብድር አገልግሎት ክፍያ ከ3.5ከመቶ ወደ 0.5በመቶ እንዲቀነስ የተደረገበት የብሔራዊ ባንክ እርምጃ ውጤታማ ነው፡፡ ይህም በግምት ሲቀመጥ 2.89 ሚለዮን የአሜሪካን ዶላር በአምራቾች ላይ የሚደርስን ወጭ መቀነስ እንዳስቻለ በምክር ቤቱ የተካሄደ የዳሰሳ ጥናት ያሳያል፡፡
ዘገባው የፍሬህይወት ታደሰ

በመንገድ ትራፊክ አደጋ በኢትዮጲያ በአምስት አመት ውስጥ 18 ሺ 24 ሰዎች ሂወታቸው ሲያልፍ አርባ ስምንት ነጥብ አንድ በመቶ የሚሆኑት ተሳፋሪዎች ፣አርባ ሶስት ነጥብ ሁለት በመቶ እግረኞች ስምንት ነጥብ ሰባት በመቶ የሚሆኑት ደግሞ አሽከርካሪዎች ናቸው፡፡
በ መንገድ ትራፊክ አደጋ በቁጥርም ሆነ በአስከፊነት ከጊዜ ወደ ጊዜ እየጨመረ ይገኛል፡፡ በመሆኑም ከፍተኛ ሰብዓዊና ቁሳዊ ውድመት እያስከተለ መጥቷል፡፡እንደ ፌደራል ፖሊስ ኮሚሽን መረጃ በ2008 በአገር አቀፍ ደረጃ የ4 ሺህ352 ዜጎች ሕይወት ጠፍቷል:: በአምስት አመት ውስጥ 18 ሺህ 24 ሰዎች ህይወታቸው ሲያልፍ ከነዚህም መካከል48.1 በመቶ ተሳፋሪዎች 43.2 በመቶ እግረኞች 8.7በመቶ የሚሆኑት ደግሞ አሽከርካሪዎች ናቸው:: ከዚህም በተጨማሪ በዚህ አመት በ12ሺህ ዜጎች ላይ ከባድና ቀላል አደጋ ደርሷል::
በክልል ደረጃ አምስቱ ክልሎች በአጠቃላይ ከ90 በመቶ በላይ የሞት አደጋ ያስተናግዳሉ፣ኦሮሚያ ከ35 በመቶ በላይ ሞት በመያዝ ከፍተኛውን ቁጥር ሲይዝ አማራ ከ22 በመቶ በላይ ሞት በመያዝ ሁለተኛ ደረጃ ይዞል በአገር አቀፍ ደረጃ የሞት ጉዳቱ በጾታ ሲሰላ ከ75 በመቶ በላይ የሞት ተጋላጭ የሆኑት ወንዶች ናቸው፡፡
በአለማችን ከሚደርሱ አራት ሞቶች ውስጥ ሶስቱ በመኪና አደጋ ነው ፡፡ አንድ ነጥብ ሀያ አራት ሚሊየን ዜጎች በመኪና አደጋ ህይወታቸውን ያጣሉ እነዚህም እድሜያቸውም 15-29 የሚሆኑት ከፍተኛውን ደረጃ ይይዛሉ፡፡
የመንገድ ትራፊክ አደጋ በአሁኑ ጊዜ በዓለም ላይ ገዳይ ከሚባሉ የተፈጥሮና ሰው ሰራሽ በሽታዎች መካከል በ9ኛ ደረጃ ላይ የሚገኝ ሲሆን የተቀናጀና የተደራጀ ርምጃ ካልተወሰደበት በ2030 1.9 ሚሊዮን ሰዎችን ህይወት በማጥፋት ወደ ሶሰተኛ ደረጃ ከፍ እንደሚል ይገመታል፡፡ ዘገባው የፍሬህይወት ታደሰ ነው

ተመሳሳይ የበረኪና ምርት ለ ህ/ቡ አቅርቧል በሚል በኢፌደሪ የንግድ ዉድድርና የሸማቾች ጥበቃ ባለስልጣን ክስ የተመሰረተበት ጌት እሸት ዲተርጀንት ማምረቻና ማሸጊያ ሃላፊነቱ የተወሰነ የግል ማህበር በትናንትናዉ እለት በተቋሙ የወንጀል ችሎት ላይ ቀርቦ የቃል ክርክሩን አደረገ፡፡
የጮራ የጋዝና የኬሚካል ዉጤቶች ማምረቻ ድርጅት የሆኑትን ሴዴ እና ሴዴክስ የተባሉ የበረኪና ምርቶችን የንግድ ምልክት በቀለም፣በኢንደስትሪያል ንድፍ አመሳስሎ ለገበያ አቅርቧል በሚል ድርጅቱ ባቀረበዉ አቤቱታ መሰረት ባለስልጣን መ/ቤቱ በተጠርጣሪዉ ላይ ክሱን መስርቷል
በትናንትናዉ እለትም በዋለዉ ችሎት ከሳሽ የባለስልጣን መስሪያ ቤቱ የክስ ባለሞያ እንዳቀረቡት በ ኢፌደሪ አእምሮአዊ ንብረት ጽ/ቤት ጥበቃ የተሰጠዉን የ ጮራ የጋዝና የኬሚካል ዉጤቶች ማምረቻ ድርጅት ምርቶች ተከሳሽ ጌት እሸት ዲተርጀንት ማምረቻና ማሸጊያ ሃላፊነቱ የተወሰነ የግል ማህበር ተገቢ ያልሆነ የንግድ ዉድድር ለማድረግ በማሰብ የድርጅቱን የምርት ዉጤቶች ያለምንም ህጋዊ ፍቃድ ስያሜዉን ታይድ በሚል ቀይሮ ከቀለም እና ከኢንደስትሪያል ንድፍ መመሳሰል በተጨማሪ ጌት እሸት የሚለዉ የድርጅቱ ስያሜ የተጻፈባቸዉ ተመሳሳይ ምርቶችን በገበያ ላይ አዉሏል፡፡
በዚህም የተነሳ በገበያ ዉስጥ ሸማቹ በተመሳሳይ የምርት ማሸጊያ እንዲደናገር ሆኗል የተወዳዳሪዉ ነጋዴ ጥቅም ላይም ጉዳት አስከትሏል ስለሆነም ይህ ተገቢ ያልሆነ የንግድ ዉድድር እንዲቆም እና በአዋጁ የተጠቀሰዉ የቅጣት ጣሪያ እንዲጣልባቸዉ ሲል ክሱን አሰምቷል፡፡
የተከሳሽ ጌት እሸት ዲተርጀንት ማምረቻና ማሸጊያ ሃላፊነቱ የተወሰነ የግል ማህበር ጠበቃ በበኩላቸዉ ተገቢ ያልሆነ የንግድ ዉድድር አልፈጸምንም በክሱ የተጠቀሰዉ የድርጅት አድራሻም የኛ አይደለም ይህን እየፈጸመ የሚገኝ ሌላ የበረኪና አምራች ድርጅት አለ እኛም የንግድ ስማችንን ያለኛ ፍቃድ ያለአግባብ ተጠቅሟል በሚል ክስ መስርተንበት ጉዳዩ በከፍተኛዉ ፍ/ቤት እየታየ ነዉ በተጨማሪም ድርጅቱ በአሁኑ ሰአት ካለበት የባንክ ጉዳይ ጋር በተያያዘ ምንም ስራ እየሰራ አይደለም ቀድሞ የድርጅቱ ባለቤቶች ከነበሩት ግለሰቦች ድርጅቱን ከተረከብን ከ 2005 ጀምሮ ምንም አይነት የበረኪና ምርት አምርተን ለ ገበያ አቅርበን አናዉቅም ሲሉ ተከራክረዋል፡፡
ያልተገባ የንግድ ውድድር ስለማድረጋችን እንዲሁም በገበያዉ ላይ ተመሳሳይ ምርቶችን ስለማሰራጨታችን የሚያስረዳ የሰነድም ሆነ ሌሎች ማስረጃዎች ስላልቀረቡብን ልንጠየቅ የምንችልበት አግባብ ባለመኖሩ ነጻ ልንሆን ይገባል ለደረሰብን መጉላላትም አስፈላጊዉ ዉሳኔ ይሰጠንም ሲሉ ጠይቀዋል፡፡
ችሎቱ የግራ ቀኙን ቅሬታ ካዳመጠ በኋላ የሁለቱንም ወገኖች ምስክሮች ለመስማት ለ ነሀሴ 26-12-09 ቀጠሮ ይዟል፡፡
ዘገባው የእጹብ ድንቅ ነው

በትግራይ ክልል አራት ቦታዎች ላይ በተደረገ የቅርስ ፍለጋና ምርምር የአሸንዳን ጥንታዊነት የሚገልጹ አልባሳት እና ቁሳቁሶች ተገኙ፡፡
የጀርመን እና የኢትዩጲያ የቅርስ ፍለጋና ምርምር ባለሙያዎች ከ3 አመታት በፊት አንስቶ ሲያከናውኑት በነበረው የቅርስ ፍለጋና ምርምር ተግባር ከ50 ያላነሱ የአሸንዳ ታሪካዊነትን የሚያመላክቱ ቅርሶችን አግኝተዋል፡፡
የትግራይ ክልል ባህልና ቱሪዝም ቢሮ ሀላፊ አቶ ዳዊት ሀይሉ ለዛሚ ብቻ እንደተናገሩት በሀውዜን፤ በውቅሮ፤ በበጋሀሙስ እና በአክሱም የሀ አካባቢዎች ሲከናወኑ የነበሩ የምርምር ስራዎች የአሸንዳ ባህል በክልሉ ከጥንት ጀምሮ ሲከበር እንደነበር አመላካች የሆኑ ቁሳቁሶችና ጌጣጌጦች ተገኝተዋል ብለውናል፡፡
ሴቶች ይጠቀሙበት የነበረ የአንገት ተንጠልጣይ ጨሌዎች፤ ጥንታዊ የሽቶ መያዣ እንዲሁም ከሸማ የተሰሩ ባህላዊ የሴቶች ልብሶች ከተገኙት መካከል ተጠቃሽ ናቸው፡፡
እነዚህ ቅርሶች በአሁን ሰአት በከተማው ሙዚየም ለህዝቡ እይታ ቀርበዋል፡፡
ሲል ያልፋል አሻግር የአሸንዳ በአል ከሚከበርበት ከመቀሌ ሆኖ ዘግቦታል፡፡

የኢትዮጵያ ብሔራዊ ቡድን ጥር ላይ ኬንያ በምታስተናግደው የ2018ቱ የአፍሪካ ሃገራት ሻምፒዮና (ቻን) ማለፍ ሳይችል ቀረ።
የመጨረሻ ማጣሪያ የመልስ ጨዋታ በሱዳን ኦቤይድ ከተማ ማምሻውን ከሱዳን አቻው ጋር ተጫውቶ 1-0 ተሸንፏል።
ብሔራዊ ቡድኑ ከሳምንት በፊት ሱዳንን በሀዋሳ ኢንተርናሽናል ስታዲየም አስተናግዶ 1-1 መለያየቱ የሚታወስ ነው ።
በድምር ውጤት 2-1 ተሸንፎ ለ3ኛ ጌዜ በቻን የመሳተፍ እድሉን ማሳካት ሳይችል ቀርቷል።

ኢትዮጲያ የአየር ንብረት ለውጥን ለማቋቋምና ለአረንጎዴ ኢኮኖሚ ልማት የሚውል የአንድ ነጥብ ሰባ አራት ቢሊዮን ብር ድጋፍ ከኖርዌይ ተደርጎላታል፡፡
የአየር ንብረት ለውጥን ለመከላከል ደን በተራቆተባቸው አከባቢዎች ደን በማልማት የተለያዩ የብዙሃን ህይወት አካላትንና ውሃን ከጥፋት ለመታደግ እንደሚሰራ ተገልጸዋል፡፡በተገኘው ድጋፍ ስድስት መቶ ስልሳ ሺህ ሄክታር መሬት በደን በመሸፈን በደቡብ ክልል ፣በጋንቤላ ፣ኦሮሚያ ክልሎች እስከ 2020 የካርቦንዳኦክሳይድ ልቀትን ለመቀነስ እንድሁም በአማራ እና በትግራይ ክልል ማህበረሰቡን በማሳተፍ 800 ሺህ ሄክታር መሬት በደን ለመሸፈን ታቅዶል፡፡
የሙቀት መጨመር፣ ድርቅ፣ ከባድ ጎርፍ፣ የዝናብ መጠን መቀነስና የወቅት መዛባት የአየር ንብረት ለውጡ ዓበይት ክስተቶች ናቸው፡፡ የበርሃማነት መስፋፋትም እንዲሁም ለግብርና ምርት መቀነስ ብሎም ፍሬ አልባነት መንስኤ እየሆነ ይገኛል፡፡ ለአየር ንብረት ለውጥ ዋና መንስኤነት የሚጠቀሰው ወደ ከባቢ አየር የሚለቀቀው በካይ ጋዝ የደን መመናመን እንደሚያስከተል በተደጋጋሚ የዘርፉ ምሁራን እየገለጹ ይገኛሉ ።
በተለይ እንደ ኢትዮጲያ በግብርና ላይ የተመሰረተ ኢኮኖሚ ያላቸው ሀገራት የአየር ንብረት መዛባት ለግብርና ምርታማነት ትልቅ እንቅፋት ሆኗል፤ ምክንያቱም ትልቅ ተፅእኖ እያሳደረ ያለው በግብርና ምርታማነት ላይ ነው፡፡ በዚህም አመት ከወጡ ጥናቶች መካከል በታኒክ ጋርደን የተባለ መቀመጫውን እንግሊዝ ያደረገው የጥናት ድርጅት በኢትዮጲያ መንግስት ድጋፍ ባደረገው ጥናት የኢትዮጲያ አረቢካ ቡና በአየር ንብረት ለውጥ ምክንያት ወደ ከፍተኛ አከባቢዎች ተወስዶ ማብቀል ካልተጀመረ በ2090 አደጋ ላይ እንደሚወድቅ ተረጋግጧል፡፡ ለእዚህም እንደ ኢትዮጵያ ያሉ ሀገሮች የአየር ንብረት ለውጡን ለመቋቋምና ለመከላከል የሚያስችል የአረጓዴ ልማት ስትራቴጂ ተግባራዊ እያደረጉ ነው፡፡
ይህንን ችግር ለመፍታት ከፍተኛ ገንዘብ፣ የሰው ኃይልና የአረንጓዴ ልማት ቴክኖሎጂዎች ይጠይቃል፡፡ከዚህ ቀደም ይህንን ችግር ለመፍታት እና የተስተካከለ የአየር ንብረት ለውጥ እንዲመጣ እንዲሁም የኢትዮጵያን የአረንጓዴ ልማት ስትራቴጂ ለመደገፍ ኖርዌይ፣ሲዊድን፣ ዴንማርክ፣ ፈረንሳይ፣ እንግሊዝ ፣ የአውሮፓ ህብረት፣ አሜሪካ ተስማምተው ነበር ፡፡በስምምነቱ መሰረት ኖርዌይ የአንድ ነጥብ ሰባ አራት ቢሊዮን ብር ድጋፍ አድርጋለች፡፡
ዘገባው የፍሬህይወት ታደሰ ነው

ኢ ዲ ኤች ኤስ በተባለ አለም አቀፍ የህብረተሰብ እና የጤና ጉዳዩች ጥናት አድራጊ ድርጅት በኢትዩጲያ ስለ ህዝቡ አኗኗር እና ቤቶቻቸው ባደረገው ጥናት ካሳወቃቸው ግኝቶች መካከል ከ4 ቤቶች አንዱ በእማ ወራ እንደሚመራ አመላክቷል፡፡
ጥናቱ በእያንዳንዱ ቤት በአማካይ 4.6 ሰዎች ይኖራሉም ብሏል፡፡ በአጠቃላይ በማህበረሰቡ ላይ ባደረገው ጥናትም ከኢትዩጲያ ህዝብ 47 በመቶው ከ15 አመት በታች መሆኑን አሳይቷል፡፤
በቤቶች አቅራቢያ የሚገኝ የመጠጥ ውሀ እና የኤሌክትሪክ አቅርቦትም በከተማ 65 በመቶው ህብረተሰብ በገጠር ደግሞ 57 በመቶው ተጠቃሚ ነው ብሏል፡፡ ነገር ግን በአጠቃላይ በኢትዩጲያ ያለው የጤና አጠባበቅ 6 በመቶ ብቻ ሆኗል፡፡
16 በመቶ የሚሆኑት የከተማ ነዋሪዎች የጋራ መጸዳጃ አገልግሎቶችን ሲጠቀሙ ከገጠር ነዋሪዎች ግን 4 በመቶው ብቻ የጋራ መጸዳጃዎች ይጠቀማሉ፡፡ በሀገሪቱም 94 በመቶ የሚሆኑት ቤቶች ዘመናዊ የመጸዳጃ ቤቶች እንደሌሏቸው ተጠቅሷል 9 በመቶ የሚሆኑት ሰዎችም የጋራ መጸዳጃዎችን እንደሚጠቀሙ ተገልጾል፡፡
ከኢትዩጲያ ህዝብ ያልተስተካከሉ የጋራ መጸዳጃ ቤቶች ተጠቃሚዎች 53 በመቶ ሲሆኑ 32 በመቶው ምንም አይነት መጸዳጃ ቤቶች የሏቸውም፡፡
የኤሌክትሪክ ሀይልን በተመለከተ 26 በመቶ የሀገሪቷ ቤቶች አቅርቦቱ ሲደረግላቸው ከዚህ ውስጥ 93 በመቶው አገልግሎት ለከተማዎች የሚቀርብ ነው፡፡ ከገጠሩ ክፍል 8 በመቶው ብቻ የመብራ ሀይል ተጠቃሚዎች ናቸው፡፡
የእቃዎች ባለቤትነትን በተመለከተ 56 በመቶው የሚሆነው የኢትዩጲያ ህዝብ የተንቀሳቃሽ ስልክ፤ 28 በመቶው የሬድዩ እና 14 በመቶ የሚሆነው የቴሌቪዥን ባለቤት ነው፡፡
የኢትዩጲያ መንግስትን ጨምሮ በዩ ኤስ ኤይድ፤ በዩኒ ሴፍ፤ በዩ ኤን ለሴቶች እና በሌሎች አምስት ዋና ዋና አለም አቀፍ የእርዳታ ድርጅቶች ጥናቶችን እንዲያደርግ የገንዘብ ድጋፍ የሚደረግለት ኢ ዲ ኤች ኤስ ይህንን ጥናት ለማካሄድ በ9 ክልሎች እና በሁለት የከተማ አስተዳደሮች በ16ሺህ 650 ቤቶች የሚኖሩ እድሜያቸው ከ15- 49 የሆኑ 15 ሺህ 683 ሴቶችን፤12ሺህ 688 እድሜያቸው ከ15- 59 የሚገኙ ወንዶችን ከተመረጡ የሀገሪቷ ክፍሎች የቤት ባለቤቶች ጋር ቃለ ምልልስ አድርጓል፡፡
ይህ ጥናትም 95 በመቶ የሚሆኑ ሴቶችን እና 86 በመቶ የሚሆኑ ወንዶችን ምላሽ ያጠናከረ ነው፡፡

ያልፋል አሻግር ዘግቦታል፡፡

የታላቁ ህዳሴ ግድብ ግንባታ ህዝባዊ ተሳትፎ አስተባባሪ ብሄራዊ ምክር ቤት ፅ/ቤት በ2009 ባዘጋጀው የህዳሴ ቶምቦላ አገኛለው ካለው ገቢ 40 ሚሊየን ብር ቀነሰበት
የታላቁ ህዳሴ ግድብ ግንባታ ህዝባዊ ተሳትፎ አስተባባሪ ብሄራዊ ምክር ቤት ፅ/ቤት አንድ ቶምቦላ ቲኬት ለታላቁ ህዳሴ ግድብ በሚል መሪ ቃል በ2009 በጀት አመት ባዘጋጀው የቶምቦላ ሽልማት አንድ መቶ ሚሊየን ብር ገቢ ለማግኘት አስቦ አርባ ሚሊየን ብር በማጣት ስልሳ ሚሊየን ብር የተጣራ ገቢ ማሰባሰብ ችሏል፡፡
የታላቁ ህዳሴ ግድብ ግንባታ ህዝባዊ ተሳትፎ አስተባባሪ ብሄራዊ ምክር ቤት ፅ/ቤት ምክትል ዋና ዳይሬክተር የሆኑት ክብርት ወ/ሮ ፍቅርተ ታምር በዕቅድ ልክ ገቢው ያልተሰበሰበው በአገሪቱ ያሉት የብሄራዊ ሎተሪ መሸጫ ቢሮዎች አነስተኛ በመሆናቸውና ሎተሪው በሚሸጥበት ወቅት ሌሎች ተደራራቢ ሎተሪዎች መኖራቸው ያሰብንውን ያህል እንዳንሸጥ አድርጎናል ብለዋል፡፡
ፅ/ቤቱ በቀጣይ አንድ ነጥብ አራት ቢሊዮን ብር ለመሰብሰብ ያሰበ ሲሆን እስካሁን በቦንድ ግዢው ተሳትፎአቸው አነስተኛ የነበሩትን አርሶ አደሮችና አርብቶ አደሮች አሳትፋለው ከፍተኛ ገቢ አገኝበታለውያልኩትን የዲያስፖራ ሎተሪ ለመጀመር መሬት ከአማራ ብሄራዊ ክልላዊ መንግስትና ከአዲስ አበባ ከተማ አስተዳደር አግኝቼ ለሽልማት የሚሆን ቪላ ቤት ይቀረኛል ብሏል፡፡
የግድቡ ግንባታ 60 ፐርሰንት ላይ የደረሰ ሲሆን እስካሁን ለግድቡ ግንባታ ከህዝቡ ከ10.1 ቢሊየን ብር በላይ ተሰብስቧል፡፡
ምትኬ ቶሌራ

የልማት ድርጅቶች ሚኒስቴር በስሩ ለሚገኙ ሶስት ድርጅቶች ካፒታል ማስተካከያ ተደረገ፡፡

በመንግሥት የልማት ድርጅቶች ሚኒስቴር ሥር የሚገኙ የኢትዮጵያ ማዕድን፣ነዳጅና ባዬፊዩል ኮርፖሬሽን ፣ የብርሃንና ሰላም ማተሚያ ድርጅት ፣የአሰላ ብቅል ፋብሪካ እና የብሔራዊ አልኮልና አረቄ ፋብሪካ ካፒታል መጠንን ሚኒስቴር መሥሪያ ቤቱ የተጠቀሱትን የልማት ድርጅቶች ካፒታል ፈትሾ እንዲስተካከል የውሳኔ ሀሳብ ለሚኒስትሮች ምክር ቤት ያቀረበ ሲሆን፣ ምክር ቤቱ ነሐሴ 5 ቀን 2ዐዐ9ዓ.ም. ባካሄደው ስብሰባ የውሳኔ ሀሳቡን ተቀብሎ አጽድቋል፡፡

በዚሁ መሠረት የኢትዮጵያ ማዕድን፣ ነዳጅና ባዩፊዬል ኮርፖሬሽን በሚኒስትሮች ምክር ቤት ደንብ ቁጥር 367/2ዐዐ8 ሲቋቋም የተፈቀደ ካፒታሉ ብር 15.26 ቢሊዬን እና የተከፊለ ካፒታሉ ብር 4 ቢሊዬን መሆኑ የተጠቀሰ ቢሆንም ኮርፖሬሽኑ ወደ ሥራ ሲገባ በተጨባጭ የተከፈለው ካፒታል ብር 419.6 ሚሊዮን ብቻ መሆኑ ተረጋግጧል ፡፡
ስለሆነም የዚሁ የተከፈለ ካፒታልን መነሻ በማድረግ በአዋጅ ቁጥር 25/84 አንቀጽ 2ዐ (1) መሠረት የተፈቀደ ካፒታሉ ወደ ብር 1ቢሊዩን 678ሚሊዩን 64ዐሺህ ዝቅ እንዲል ተደርጎ ተስተካክሏል፡፡

የብርሃንና ሰላም ማተሚያ ድርጅት በሚኒስትሮች ቤት ደንብ ቁጥር 22/1985 ሲቋቋም የተከፈለ ካፒታሉ ብር 8.39 ሚሊየን ብር የነበረ ሲሆን፣ ከዚያን ጊዜ ጀምሮ ምንም ዓይነት ማሻሻያ ሳይደረግበት ቆይቷል፡፡
አሁን የድርጅቱ የተከፈለ ካፒታል ወደ ብር 382ሚሊዩን 177ሺህ እና የተፈቀደ ካፒታሉ ደግሞ ወደ ብር 1ቢሊዩን 528ሚሊዩን 700 ሺኅ ብር እንዲያድግ ተደርጓል፡፡
በተመሳሳይ ሁኔታ ከሃያ ዓመት በፊት በሚኒስትሮች ምክር ቤት ደንብ ቁጥር 74/1985 እንደገና ተቋቁሞ በመንቀሳቀስ ላይ የሚገኘው የብሔራዊ አልኮልና አረቄ ፋብሪካ የተከፈለ ካፒታል ብር ወደ ብር 220ቢሊዩን 985ሚሊዩን 434ሺህ 93 እንዲያድግ በሚኒስቴሩ የቀረበው የውሳኔ ሀሳብ ተቀባይነት አግኝቷል፡፡
እነዚህ የካፒታል ማሻሻያዎች የልማት ድርጅቶቹ ማቋቋሚያ ደንቦች በነጋሪት ጋዜጣ ታትመው እንዲወጡና ተግባራዊ እንዲደረጉ የሚኒስትሮች ምክር ቤት መወሰኑ ታውቋል፡፡
ናርዶስ ዩሴፍ

ሦስት አክስዮን ማኅበራት ከኬሚካል ኢንዱስትሪዎች ኮርፖሬሽን ጋር እንዲዋሀዱ ውሳኔተሰጠ፡፡
አዳሚ ቱሉ ፀረ ተባይ ማዘጋጃ አክሲዮን ማኅበር፣ አዋሽ መልካሳ አሉሚኒየም ሰልፌትና ሳልፈሪክ አሲድ አክሲዮን ማኅበር እና ኮስቲክ ሶዳ አክሲዮን ማኅበር ከኢትዮጵያ ኬሚካል ኢንዱስትሪዎች ኮርፖሬሽን ጋር እንዲዋሀዱ የመንግሥት የልማት ድርጅቶች ሚኒስቴር ያቀረበውን የውሳኔ ሀሳብ ተቀብሎ የሚኒስትሮች ምክር ቤት ነሐሴ 5 ቀን 2009 ዓ.ም. ባካሄደው ስብሰባ ውሳኔ ሰጥቷል፡፡
አክሲዮን ማኅበራቱና ኮርፖሬሽኑ እንዲዋሀዱ ያስፈለገው ተቋማቱ አሁን ባሉበት አቅም የኢንዱስትሪውን ዘርፍ ለማሳደግ የሚጠበቅባቸውን ሚና በአግባቡ ሊጫወቱ ስለማይችሉ የአመራር፣ የኢንቨስትመንት፣ የሰው ኃይል፣ የግብይት እና የአሠራር አቅማቸውን አቀናጅቶ በአጭሩ ጊዜ በማጎልበት የተጠናከረ የተወዳዳሪነት ቁመና እንዲይዙ ለማድረግ ነው፡፡
አዳሚ ቱሉ ፀረ ተባይ ማዘጋጃ አክሲዮን ማኅበር በ2008 አ.ም የአሁኑ የመንግስት የልማት ድርጅቶች የቀድሞ የፕራይቬታይዜሽንና የመንግሥት የልማት ድርጅት ተቆጣጣሪ ኤጀንሲ ከሚያስተዳድራቸውና ለሽያጭ አቅርቧቸው ከነበሩ የመንግሥት የልማት ድርጅቶች ውስጥ አንዱ ነው፡፡
ባሳለፍነው አመት ከአዲስ አበባ በ165 ኪሎ ሜትር ርቀት ላይ በምትገኘው ዝዋይ ከተማ ሀገሪቱ በአመት 5.2 ሚሊዩን ዶላር ታወጣበታለች የተባለውን 2.4. d የተባለ ጸረ አረም ኬሚካል ማምረቻ ፋብሪካውን ገንብቶ ስራ ጀምሮ ነበር፡፡
በወቅቱ አክሲዩን ማህበሩን ማስፋፊያ ፕሮጀክቶቹን ለመቀጠል የ5 አመት እቅድ መዘጋጀቱ እና በተጨማሪም ያሉትን የጸረ አረም ምርቶች ቁጥርም ከ 23 ወደ 37 ለማሳደግ እየሰራ መሆኑ ተገልጾ ነበር፡፡
የጸረ-ተባይ ማዘጋጃ ማኅበሩ በ1987 ዓ.ም. ወደ ሥራ የገባ ሲሆን፣ በ2000 ዓ.ም. በ40.5 ሚሊዮን ብር ካፒታል በአክሲዮን ኩባንያ ደረጃ እንዲዋቀር ተደርጓል፡፡ እስከ 2008 አ.ም ድረስም 435 ሠራተኞች የነበሩት ሲሆን፣ 343ቱ ቋሚ ናቸው፡፡
ማህበሩ በመንግሥት የልማት ድርጅቶች ወደ ግል ለማዛወር ሁለት ጊዜ ጨረታ ወጥቶ በግዥ እጦት ሳይዛወር ቀርቷል፡
በአሁን በድርጅቶቹ እና በኮርፖሬሽኑ በተደረገው ውህደት በሚፈጠረው ኮርፓሬሽን አስተዳድራዊ ወጪ የመቀነስ ውጤት ሊኖረው የሚችል ሲሆን፣ በውህደቱ የተጣመሩ ተቋማት እንደየሥራ ባህሪያቸው የተመጣጠነ ውስጣዊ የአመራር ነጻነት ይኖራቸዋል፡፡ የተዋሀዱት ተቋማት ምርቶች ለግብርና፣ ለምግብ፣ ለኮንስትራክሽን፣ ለጤና፣ ለቆዳና ቆዳ ውጤቶች፣ ለጨርቃ ጨርቅ እና ለሌሎች በርካታ ኢንዱስትሪዎች ግብዓት የሚያገለግሉ ናቸው፡፡
የተጠቀሱት የኬሚካል ማምረቻ አክስዮን ማኅበራት ከኬሚካል ኮርፖሬሽን ጋር ሲዋሃዱ የኮርፓሬሽኑን ማቋቋሚያ ደንብ ቁጥር 280/2005 ማሻሻል አስፈላጊ በመሆኑ የሦስቱ አክሲዮን ማኅበራት መብትና ግዴታዎች ወደ ኮርፓሬሽኑ ተዛውረው እንዲሻሻል ተደርገጓል፡፡
የኮርፓሬሽኑ የፈቀደ ካፒታልም ብር 21.7 ቢሊዮን የነበረው ወደ ብር 21ቢሊዩን 719 ሚሊዩን 751ሺህ 376 ብር እና የተከፈለ ካፒታል ብር 5.4 ቢሊዮን ብር 5ቢሊዩን 893ሚሊዩን 694ሺህ እንዲሆን ተወስኗል፡፡